日清新推的「贅沢海膽濃厚奶油杯麵」剛於11月19日在日本上市，引來熱話，而出名反應快嘅香港已經有唔少地方有得買，等大家唔使專登到日本掃貨。不過究竟海膽有冇海膽味呢？另一邊廂，來自台灣嘅「星球工坊爆谷」周不時推出令人驚喜嘅口味，最新作就聯乘其他兩個當地品牌「快車肉乾」和「歐可奶茶」，分別研發出豬肉紙味爆谷和奶茶爆谷，味道究竟又係點？等CONY開箱即試，同大家報告！
真•海膽杯麵？
海膽一向係日本嘅高級食材，細滑口感，濃郁鮮甜，回甘的味道，每食一口都令人幸福滿瀉。日清「贅沢海膽濃厚奶油杯麵」係日本高級食材版《リッチ》系列，「贅沢（日語讀音Zeitaku）」意思正正係奢華咁解。奶白色的忌廉湯底，配料當然有「海膽」，不過係日清自家研發嘅「類海膽」，聲稱當中有6.9%嘅海膽成份，仲附有一包調味油，焗熟完麵先加落去。
除咗顏色之外，坦白講「類海膽」外貌同真海膽其實完全唔似。眾所周知，海膽唔新鮮就會好腥，所以食之前CONY真係冇乜期望，點知食落佢又真係有少少海膽味，仲唔腥，幾有驚喜。另外西蘭花雖然冇乜西蘭花味，不過口感好似。
至於湯底方面，倒入附上的牛油之後香氣十足，而忌廉湯味道頗濃郁，又唔會太鹹。雖然幾好飲，不過為咗健康著想，大家都係少飲為妙。整體而言，配料頗為做到新鮮食材原有嘅味道與質感，而且湯底與海膽味道幾夾，果然係高級版杯麵。
贅沢海膽濃厚奶油杯麵
銷售點：Ztore士多
售價：$23.9
驚喜爆谷口味
每次聽到星球工坊推出嘅新口味都會嚇一跳，然後得啖笑，不過呢種笑唔係嘲笑，係驚喜開心嘅笑。今次推出奶茶口味都算正常，但竟然諗到推出豬肉紙口味，真係不得不佩服研發人員嘅心思，不過今次味道有冇驚喜呢？
「快車肉乾」係台灣其中一間肉乾老字號，頗為有名，當中以「杏仁薄脆肉紙」最為暢銷，而今次星球工坊就將呢款招牌產品製作成「快車香脆肉紙爆谷」。雖然豬肉紙嘅味道不算好突出，但鹹香十足，配合微甜嘅爆谷令味道互相平衡，足以令人食唔停口。
至於「歐可真奶茶爆谷」就聯同人氣網購品牌「歐可茶葉」推出，將純正錫蘭紅茶和焦糖煲完後，裹上爆谷，再加上奶粉製成。食落唔會太甜，奶茶味慢慢滲出，茶味十足仲有餘韻，但略嫌奶與茶的味道未夠平衡，奶味更濃就完美。
快車香脆肉紙爆谷、歐可真奶茶爆谷
銷售點：星球工坊專賣店、Ztore士多及HKTV Mall
售價：$60/盒
推出日期：12月3日
