無人駕駛係呢個時代都唔係啲咩新奇嘢嚟㗎啦，甚至美國亦已經有無人駕駛的士，香港都唔輸蝕，開始有無人駕駛小巴進行載人測試，相信見到香港出現無人駕駛巴士、的士嘅日子指日可待啦！
目前香港有8架自動車進行緊測試，8架車嘅自動化技術全部都已經達到國際標準第四級別，其中兩架已經開始喺元朗錦綉花園進行為期約七個月嘅載人測試，接載居民穿梭屋苑，兩架小巴嘅規格一樣，其中一架可以坐12個人，而另一架就因為配置咗輪椅位，所以只有八個位。
廣告（請繼續閱讀本文）
無人駕駛小巴上面安裝咗人工智能系統代替司機駕駛，四邊車身嘅15個雷達同識別鏡頭系統會喺行駛緊嘅時候收集周圍嘅即時數據，配合高清電子地圖同圖像處理技術，人工智能系統就可以準確咁分析路面情況。另外自動車仲會運用5G技術，透過智慧燈柱喺雲端即時監控車輛嘅所有狀況。
講到無人駕駛，大家可能最關注嘅就係安全性問題，汽車科技研發中心行政總裁張梓晶就表示先前佢哋已經反覆測試，仔細調校，同時因為錦綉花園嘅路段環境比較簡單，所以先會揀錦綉花園為測試嘅路線。除此之外，運輸署亦會喺測試期間監管住小巴嘅車速、測試路線同後備駕駛員嘅資格。夠唔夠安全就交返俾大家自行判斷啦，但無人駕駛小巴進行載人測試無疑對香港自動車嘅發展都算係行前咗一大步嘅。
▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/
廣告（請繼續閱讀本文）