最新資訊
【專訪】利潔時夥拍九龍樂善堂宣揚潔手訊息
捐贈滴露潔手產品 滿足逾5，500個家庭六個月潔手需要
藉「全球洗手日」籲大眾將潔手習慣融入生活
為響應每年10月15日「全球洗手日」，利潔時有限公司（「利潔時香港」）及旗下品牌滴露，積極透過商社合作鼓勵香港市民建立恆常潔手習慣。早前利潔時香港夥拍香港百佳超級市場推出「您買我捐」活動，獲得廣大消費者支持，至今已透過九龍樂善堂的轄屬單位，包括12所學校、3棟社會房屋及深水埗社區客廳，捐贈滴露潔手液予超過5，500個有需要家庭，滿足他們六個月的潔手需要。
利潔時香港及台灣總經理Boudewijn Feith表示：「利潔時一直致力讓人們平等地享有高品質的衞生防護，創造更潔淨、更健康的世界。為配合今年『全球洗手日』的主題—『為何潔手仍然重要？』，我們與九龍樂善堂啟動年度合作計劃，宣揚潔手的重要性，推動大眾將潔手視為日常生活必要的一部分，為社會帶來正面改變。」
利潔時香港及台灣總經理Boudewijn Feith
除了產品捐贈外，利潔時香港亦從多方面協助社區客廳會員改善衞生習慣，例如在社區客廳的洗手位置張貼「正確洗手七部曲」海報、推出「乜手物手 密密洗手」打卡挑戰、添置衞生教育圖書等，透過反覆的提醒，令劏房戶家庭逐步建立良好的潔手習慣，並且了解80%細菌由手部傳播的衞生知識。
九龍樂善堂項目發展部（社區客廳）中心主任Alvin /鄺氏一家
今次我們邀請了九龍樂善堂項目發展部（社區客廳）中心主任Alvin ，以及社區客廳會員鄺氏一家進行專訪，了解社區衞生教育工作。
嘉賓：Alvin、鄺氐一家嘉賓：Angela Yue
正面教育成效高 建立社區潔手風氣
九龍樂善堂項目發展部（社區客廳）中心主任Alvin
Angela：Alvin 你好，以你觀察一般嘅劏房戶，對於保持個人衞生方面，會唔會有困難之處？
Alvin：都有一定嘅困難，根據調查顯示，全香港有超過十萬個劏房戶家庭，大部分收入都偏低，所以佢哋會將收入集中喺食住行三個方面，往往忽略咗醫療同衞生方面嘅支出。而劏房戶嘅生活環境，通常比較狹窄，通風比較唔流通，大廈嘅環境衞生都會比較惡劣，以致影響咗佢哋維持衞生嘅一啲習慣。
Angela：咁相比起同利潔時合作之前，而家嘅社區客廳會員，喺注重個人衞生方面，會唔會改善咗好多呢？
Alvin：都明顯改善咗好多嘅。今次同利潔時嘅合作，除咗可能係一啲產品上嘅支援之外啦，我哋仲會有一個「正確洗手七步曲」海報，去教育返小朋友同埋大人，令到佢哋可以喺社區客廳嘅任何地方，都見到相關嘅資訊同埋產品，一見到就即刻去做啦，令佢哋嘅生活習慣慢慢改善。
社商合作迴響大 衞生教育一大步
Angela：對於今次嘅社商合作呢，你最大嘅感受係乜嘢呢？
Alvin：今次好有幸我哋九龍樂善堂，同利潔時成為長期合作夥伴，向我哋轄下嘅社會房屋單位，同埋學校單位，超過5，500個家庭提供六個月嘅潔手液份量，教育返小朋友潔手嘅意識，同埋培養佢哋嘅習慣。今次社區客廳有幸成為其中一個受惠嘅單位，迴響比我哋想像中更加大，令社區客廳嘅衞生教育呢方面行前咗一大步，希望我哋繼續提升會員同小朋友嘅潔手意識，可以持之以恆繼續做落去。
Angela：身旁有鄺氐一家，有鄺生、鄺太，同埋鄺小朋友。想問鄺太當初點解會嚟社區客廳呢度嘅呢？
鄺太：有一日我喺屋企有人敲門，原來係樂善堂嘅職員上來派傳單俾我哋，佢同我介紹咗呢個客廳有啲咩設施，譬如佢同我講入邊有得煮飯啦，洗衫啦，同埋小朋友課後支援啦，仲可以發展佢哋嘅興趣班。我覺得好難以置信喎，原來有咁多設施呀，好適合我哋呀，咁樣我就嚟呢度登記做會員啦！
讓潔手融入生活 改善衞生 加強自信
Angela：成為咗呢度嘅會員之後，知道你哋其實都係呢度嘅常客嚟嘅，你覺得兩位小朋友嚟咗呢度之後，喺注重個人衞生方面，有冇改善咗好多呢？
鄺太：有呀，你都知道啲小朋友，好鍾意摸吓口、摸吓鼻咁樣㗎嘛，搓完口又搓鼻，會好唔衞生，啲細菌不停咁傳播，導致佢哋成日流鼻涕啦。特別我女兒細個，抵抗力又好差啦，佢哋又會成日咳囉。咁自從嚟到呢度，佢哋分享咗啲潔手液，同埋教佢哋按照「正確洗手七步曲」洗手之後，佢哋嘅衞生習慣改善咗非常之多。你可以感覺到佢就少摸咗鼻好多㗎啦，然後流鼻涕又少咗好多啦，咳嗽都少咗好多。
Angela：同埋知道佢哋嘅自信心，都提高咗好多係咪呀？
鄺太：係呀，因為啲小朋友如果成日流鼻涕，佢自己都會覺得好污糟，成日要攞紙巾或者用手去抹，咁樣佢哋就會冇咁自信。但而家唔會，而家佢哋改善咗好多，哥哥自信咗好多，仲交咗好多好朋友。
Angela：返到屋企嘅時候，哥哥係咪都主動做一啲個人衞生方面嘅嘢？
鄺太：係呀佢好鍾意拖地，因為佢係用積分，喺社區客廳嗰度，換取咗啲滴露產品返去，佢好鍾意攞嚟倒落啲水嗰度，溝埋一齊拖地，令我哋屋企地板好乾淨。
Angela：嗯好好喎，咁想問吓鄺太，嚟咗呢度之後，會有好多唔同嘅輔導班，又或者設施，同埋一啲免費嘅清潔用品。你覺得每個月其實係咪慳咗好多呢？
鄺太：係呀，相對嚟講慳咗好多，因為我哋嚟呢度煮飯，油鹽醬醋茶佢哋都提供嘅，所以我哋唔駛帶嚟。然後喺呢度食完飯，就睇埋電視，有時候小朋友如果太熱，佢哋沖埋涼洗埋衫先返去，所以啲電費呀水費呀，呢啲都慳咗好多，我哋平均一個月大概都可以慳到千幾蚊㗎！
為響應「全球洗手日」，利潔時香港將繼續與九龍樂善堂合作，於社區客廳推出「乜手物手 密密洗手」問答遊戲及「密密洗手」承諾卡，進一步提升小朋友的潔手意識，從少建立良好習慣。參加者只要答對全部問題，即可獲得抽獎機會乙次，有機會贏取滴露潔手產品或紀念品。此外，雙方亦會合辦「流體畫工作坊」，透過流體畫創作，向參與家庭傳遞「密密洗手，污糟Hands？洗乜驚！」的訊息， 從中養成恆常潔手的好習慣。
*本文章的內容若未經授權，不得轉載