林愷鈴稱讀建築有助創作　自爆非A0：我話冇你都唔信啦

龔慈恩餅印女兒林愷鈴（Ashley）去年以唱作歌手之姿殺入樂壇，今年初勇奪「叱咤樂壇生力軍女歌手」金獎，她近日接受電台訪問，分享作為星二代鮮為人知的成長過程、入行經過及感情生活，更自爆並非如坊間流傳感情生活一片空白。

現年25歲的林愷鈴是龔慈恩與第二任丈夫、台灣小生林煒所生的大女，她直言媽媽是她的「best friend」，母女間什麼事都會分享，至於父母長時間分隔兩地，更於她17、8歲向外公布分居，她自言當時已半隻腳踏入娛樂圈，思想比較成熟，所以不會覺得難接受：「會當自己係佢哋朋友咁去睇，覺得咁（分開）都幾好，起碼證明佢哋都仲相信愛情。」她亦稱當年媽媽一度淡出娛圈是為了照顧自己和弟弟，感謝媽咪為家庭犧牲很多：「佢個樣唔似，但其實佢係一個好tough（堅強）嘅人嚟，有時明明已經好忙，啲嘢唔關佢事佢都會攬上身，媽咪係一個好善良嘅人。」

談及入行以來最深刻的報導，林愷鈴表示是2022年被誤傳死訊：「之前有人話我墮樓輕生嗰次，我喺屋企瞓緊覺，媽媽啱啱瞓醒，敲門同我講『阿女有人話你死咗』，無嬲，只係覺好好笑，唔理點解有人要造謠。」至於面對過緋聞，有她則指過往的緋聞不會令自己焦慮：「無論係咪真，對我都唔係有傷害嘅事，都係平常心。」

林愷鈴五官精緻、氣質清純，一出道即被封為最美星二代，因曾在訪問中透露未拍過拖，被網民封為「A0女神」，不過她這次難得在節目澄清：「我今年25歲，話冇拍過拖你都唔信啦！愛情能令人成長，如果一世人都封閉自己唔同人戀愛，我會覺得呢個人係某程度上有啲缺失。」她透露自己較遲熟，中學沒有人追求，也不懂向人發放「想拍拖」的訊號，卻表示曾試過「沉船」，又指雖然媽媽龔慈恩曾有過兩段婚姻，也未動搖她對感情及婚姻的信心，她稱：「媽咪會同我分享愛情上嘅經驗，反而令我喺愛情上更聰明。」林愷鈴又自爆擇偶條件是「靚仔行先」，但自認「浪漫底」可能會一見鍾情完全意料之外的人，不過她強調：「但而家事業較忙，一切隨緣。」

林愷鈴去年轉戰樂壇即獲獎，網民有讚有彈，她直言自己會理性看待：「都好彩好多都係好constructive（建設性），好多都係建議下我可以改善啲乜，有啲為踩而踩，我係不太上心。」她亦稱這次奪獎對自己是個鼓勵：「我自己都有啲野心，有時有啲鼓勵你會覺得有壓力，但今次個獎對我而言好似撻著咗我啲火咁！」

此外，林愷鈴除了唱作才華，讀書亦是尖子，她出道初期仍在港大修讀建築學士，及至大學三年級才下定決心入行，她坦言中二已決心入讀港大建築，畢業那年要身兼學生及演員身份，的確比較吃力，她稱：「讀Archi就好intensive，好多人叫救命，我自己都覺得辛苦，幸好頭3年自己好勤力，但最後果年因為要拍兩齣劇，成績就有啲失色。我唔覺得讀完建築入行係浪費，因為讀建築時對美學啲睇法，邏輯思維，對我作歌同音樂都好有用。」