張天賦「經理人」再發聲 澄清冇靠洪嘉豪入華納：抹煞咗MC嘅努力

張天賦（MC）同洪嘉豪（Kaho）向來都老友鬼鬼，二人更於月初舉行一連三場《Kaho x MC Frenemy Live 2022 演唱會》，但日前有報導指張天賦的「經理人」及Telegram群組管理員「PY（Yee Yee）」疑似在群組公開嘲諷洪嘉豪歌曲沉悶兼形容其粉絲派應援棒「阻住其他人睇幫個地球製造垃圾」，即時惹怒粉絲，有人指Yee Yee言論有失身份，更有人表示「MC可以入華納都係靠嘉豪」等。

事後MC表示冇留意事件，決定交由公司處理。去到今日Yee Yee再於IG限動公開一篇長文，回應網民指「MC可以入華納都係靠嘉豪」一事。Yee Yee提到MC加入華納完全同洪嘉豪無關，澄清當時華納邀請MC做JUDE（曾若華）《十分錯》MV男主角及在JUDE建議下推出合唱版，繼而認識相關同事成為MC簽約華納的契機。

Yee Yee強調自己同華納高層接觸近兩個月，洪嘉豪從來沒有參與亦冇任何引薦、介紹，形容網上指「「MC可以入華納都係靠嘉豪」是扭曲事實的言論，又爆料MC同洪嘉豪確實多年前認識及夾過幾個月Band，但二人甚少聯絡，直到MC加入華納後才再次合作：「唔希望呢啲以偏概全嘅報道令更多人信以為真，抹煞咗MC同背後團隊一直以來嘅努力，甚至為二人嘅合作，建構咗一個不平等嘅關係。」最後暗示MC同洪嘉豪過去一年的合作已經結束，仲叫大家MOVE ON為各自嘅SOLO而努力。