MIRROR歌迷會年費440元 官方網站開張公佈8大着數位

上月MIRROR出席所屬公司MakerVille記者會，公佈成軍3年，終於有官方歌迷會！今日MIRROR官方社交平台分享入會詳情，同時公佈歌迷會官方網站開張，官方仲改咗個名「MIRO」畀入會的鏡粉。

MIRROR上月宣佈將成立官方歌迷會。

440蚊年費，鏡粉都話抵。

一年會籍價值港幣440元，一入會就有迎新禮盒，內裡包括：會員證、專屬會徽襟章、精美立體拼圖擺設、一套12張珍藏版明信片及紀念海報。另外7大着數位就包括：訂購MIRROR演唱會門票的機會、訂購MIRROR粉絲見面會門票的機會、網上訂購會員專屬商品的機會、網上訂購MIRROR商品的機會、MIRO會員專屬資源、訂閱MIRO會員電郵推廣訊息、訂閱MIRROR Official Fan Club電郵推廣訊息。不過都有啲細字仔戴定頭盔話「視乎供應而定」，即係商品同買門票的數量要睇情況而定，而日後部份MIRROR Fans的活動亦將設年齡限制。

MIRROR facebook公佈詳情。

迎新禮品有呢啲。

仲有Fans Meeting。

唔知有幾多門票擺歌迷會賣呢？

MIRO係咪即係鏡粉英文名呢？

至於，「揸弗人」魯庭暉亦有於社交網撰長文寫下籌備過程的感受，並表示會一路改進，請大家見諒，他寫道：「呢單嘢，係要戴定個頭盔先嘅。Mirror official fan club, 同事研究咗好耐好耐。真係好耐。背後嘅所有嘢，太多太多細節，太多太多嘢我哋左諗右諗，太多嘢要平衡，『如果咁咁咁就好』」…好喇，但如果咁咁咁，又會導致另外一啲問題出現。」

他續指：「因為呢個project同搞其他project好唔同，因為係粉絲，因為佢哋係mirror 嘅一部分。呢件事，有血有肉。我幾乎肯定，一路做一路會發現有好多超唔完美嘅地方。每個部門同事都好擔心。我睇見都戥佢哋辛苦。今日終於launch。我哋會盡力一步一步改善進步，所以頭盔位，做得未夠好多多見諒。」最後他更大讚welcome pack造得好靚，不少鏡粉見狀即秒速付款入會，亦有網民誤以為加入MIRO便可獲得演唱會門票。

魯庭暉都有出Po分享。

MakerVille行政總裁魯庭暉

更多第5波疫情資訊，請到以下專頁瀏覽按此

立即下載 | 全新《星島頭條》APP : https://bit.ly/3yLrgYZ