口罩小姐「浩南」鄭伊琪宣布誕子　BB遺傳爸爸淡定被稱「老積仔」

於2021年參加ViuTV《最後一屆口罩小姐選舉》奪冠軍入行的鄭伊琪（暱稱「浩南」），於今年1月19日在社交平台貼出BB照聲波照片，宣佈已懷孕差不多5個月，並且已「成為陳太一段時間」。日前她在5月20日（520）貼出3張孕照，預告BB還有9日便出世。鄭伊琪今日（5月30日）宣佈，她的B仔「老積仔」已經出世，「一切順順利利的開始」。

鄭伊琪在520當日出帖表示「緊張又刺激」，透露「最後呢三星期簡直係挑戰人體極限制，冇諗過轉身同埋起身係咁辛苦。」她更自嘲「人生終於試咗……耷低頭見唔到腳趾、食完飯唔想起身行」。

鄭伊琪今日在社交平台寫道：「Hi老積仔，咁細個已經有爸B淡淡定既（嘅）風範。7磅13，52cm高 巨肚除了脂肪就是你嗎？#0529 #雙子男。不用再問我小b性別啦～其實我早前也一直有透露，只是大家不夠細心留意Story內容。小b和我都很好，醫生說他昨天飲25ml，今天已飲40ml，吃好睡好乖寶寶。我傷口也復原得不錯，沒有痛～謝謝醫生和姑娘的照顧。一切順順利利的開始。」