林柏希貼圖爆「港姐十強」搲完免費Tea走數 「相中人」黃婉恩鬼祟重貼舊照

前新城電台DJ林柏希近年投身餐飲業，現時為灣仔某間餐廳擔任公關宣傳，近日他在私人FB發文炮轟某屆「香港小姐十強」的TVB女藝員主動搲着數，要求以IG出Post宣傳換取免費兩位用下午茶，但最後走數沒兌現承諾。他上載一張該位TVB女藝員的背脊相，矛頭直指2020年落選港姐、被指是何君堯侄仔女友的黃婉恩，碰巧傳媒發現她的IG今日靜悄悄重貼一張舊相，正好就是該餐廳的下午茶相片。

林柏希在今日淩晨約兩點，在私人FB帳號與朋友分享「港姐十強」的行為，寫道：「正所謂一樣米養百樣人，當中一定有好嘅，亦都有啲古靈精怪嘅，今次交手嘅女仔，可以話用一個 Tea Set 嘅價錢已經睇到佢嘅品行。」他提到有日有人於IG發訊息給他工作的餐廳，表示自己有興趣去他經營的餐廳「試食」Tea set，其後他的同事從對方的IG後發現，原來是某屆香港小姐選舉的十強入圍佳麗。他寫道：「講真，我完全唔知佢乜水，見佢都有三萬幾 followers，就諗住互惠互利啦。」

雙方聯絡後，表明以一個IG帖文換取該次餐廳Tea set的試食。林柏希說：「唔係我朋友，亦唔係我邀請，公事公辦在商言商，我提出我嘅要求，你做到就嚟，唔想嘅咪算囉，或者你可以俾錢幫襯我俾個折你都得，最重要大家開心，唔好任何一邊蝕底。」試食過後，原來這名「港姐十強」當日只在IG Story貼出一張背面相，相中更沒有看到餐廳Tea set。林柏希同事提醒對方之前的合作協定，但「港姐十強」未有回覆。林柏希表示，當晚「港姐十強」終於在IG帖文上貼出了一張自己的大頭照，雖然標記了餐廳名字，但Tea set的相片是完全糢糊的。翌日，餐廳同事更發現對方靜悄悄將該IG帖文下架。

林柏希指出︰「一個Tea Set值幾錢呀？原來你個朵就係值咁多㗎咋？哈哈！仲有，真係唔係我迫你出Post㗎，係你主動搲跟住自己應承咋，原來你嘅誠信只係值一晚。講真，我完全無嬲，只係覺得佢Cheap，好肉酸呀﹗後來我自己接手Check番件事，先發現原來佢係TVB Management嘅。你真係有權應承人哋出Post？仲有，咦！原來你個經理人，我其實識咗20幾年啦，你咁想食不如下次我請埋你同經理人一齊食囉，唔使你出Post添呀，唔好再用呢啲招數去其他餐廳呃飲呃食喇，真係影衰晒㗎﹗」

林柏希同時分享了那位「港姐十強」的背面相，網民翻查後發現林柏希所指的女藝員，疑似是2020年落選港姐黃婉恩。本來她的IG介紹一欄，曾寫有「Miss HK 2020(Top 10)」，但現時經已刪去。同時，她的IG內有一篇6日前在該餐廳享用下午茶的相片，而Tea Set的確是模糊的，而服裝亦被指在餐廳影背面相女藝員相似。其後有傳媒更發現，昨日黃婉恩的IG沒有該照片，今日卻悄悄地重新上載這幅舊相。