【搵食CONY】直撃！去Taste of Hong Kong平民價食星級料理

每年3月除咗係香港嘅藝術月，到處都係大大小小嘅藝術展覽之外，仲有一個大型美食節絕對唔可以忘記，就係Taste of Hong Kong啦！Taste美食節係全球最大嘅美食節，於2016年殺到香港，為全亞洲第一站。今年來到第三屆，Taste of Hong Kong將於今晚開鑼，美食陣容愈來愈強勁。今年搵食CONY有機會先睹為快，仲幫大家率先試食咗星級pop up餐廳嘅三道菜美食體驗。

今年有咩食？

今年同樣喺中環海濱走廊舉行，為期4日嘅Taste of Hong Kong，有超過20款由本地及海外餐廳，專為活動創作餐廳本身菜式以外嘅美食，今年更有7成半嘅餐廳係第一次參加呢個活動。除咗都爹利會館、Okra、Yardbird 和Zuma等過往曾參加過嘅餐廳，本地陣容有米芝蓮三星餐廳「廚魔」，以及曾獲亞洲50最佳餐廳2017最佳女廚師獎的「Little Bao」創辦人兼總廚；外國勢力則有來自倫敦的Bubbledogs和澳洲的Black Star Pastry，絕對係一眾食家必到嘅美食盛典。

星級pop up餐廳

Taste of Hong Kong呢個美食嘉年華大部分都提供grab & go的菜式，如果你想坐定定咁食高級美食，可以好似CONY咁，選擇到萬豪國際集團開設嘅「萬廚坊」，一嚐佢哋旗下餐廳包括麗思卡爾頓酒店嘅天龍軒、香港W酒店嘅Kitchen、萬麗海景酒店嘅Mirage Restaurant & Bar及喜來登酒店嘅Oyster & Wine Bar嘅三道菜美食體驗。

今次「萬廚坊」係萬豪國際首次跨品牌pop up餐廳，而且只需250港元就可試到三道星級料理，仲配埋一杯wine，性價比好高。而搵食CONY就選擇咗試食米芝蓮星級餐廳天龍軒嘅三道菜美食。

三道美饌評點

首先出場嘅係冰鎮芫荽鮑魚海蜇，唔好以為250蚊三道菜咁平，師傅就會偷工減料，菜式用上乾鮑製作成冷盤，有別於平時乾鮑一定要熱騰騰嘅食法，配上爽脆嘅海蜇，整道菜看似簡單但別有心思。

跟住就係香煎帶子配番茄三文魚子。雖然帶子係呢道菜嘅主角，但不得不提嘅係三文魚子超級新鮮，咬落去爽脆鮮甜，完全令帶子提升咗去另一個層次，伴以新鮮嘅番茄醬同吃又能夠減輕油膩感覺。

最後一道菜係經典懷舊小食蝦多士。傳統蝦多士會用上蝦膠製作，但天龍軒主廚就用上原隻越南白蝦製作，咬口更加爽嫩，蘸上自家製嘅甜酸汁，真係好邪惡，但好好食！同場加映天龍軒最出名嘅蜜燒西班牙黑豚肉叉燒，好多人都為咗佢慕名而來，而呢道其實係grab & go嘅小食。入口細嫩而鬆化，香味比一般叉燒更濃，果然係名不虛傳。

如果大家都想到「萬廚坊」品嚐三道美饌，可以先到「萬廚坊」預約，以免摸門釘。

Taste of Hong Kong 

3月22日：晚上6時至10時

3月23日：下午12時半至4時半；晚上6時至10時

3月24日（星期六）：下午12時半至4時半；晚上6時至10時

3月25日（星期日）：下午12時半至5時半

地址：中環海濱活動空間｜中環龍和道9號

網址：www.tasteofhongkong.com

門票詳情：https://hongkong.tastefestivals.com/tickets/