Christopher Nolan於8年前親身編導嘅電影《Inception》（《潛行凶間》）大受歡迎，其中令人討論得最熱烈嘅，必定係主角Cobb喺結局一幕轉動圖騰，留底伏線比觀眾討論。8年之後，終於由演員Michael Caine親自為大家揭曉最終結局啦！
相信有睇過《Inception》嘅朋友都會對結局非常深刻，喺最後一幕，觀眾仲未睇清圖騰係會停定唔會停一刻，套戲已經結束。令大家其後不斷猜測，究竟Cobb係返咗現實，定係仲喺夢境當中。
如今由飾演Cobb岳父嘅著名演員Michael Caine，為大家親自解釋～
Michael Caine係Nolan長期合作嘅演員之一，近日出席倫敦「Film4 Summer Screen」時，除咗向觀眾簡介《Inception》外，仲突然自爆收到劇本時嘅反應，仲提醒在場觀眾要留意佢講嘅說話，因為馬上就要知道結局謎底！
Michael Caine指收到劇本時非常疑惑，於是向Nolan表示分唔清「到底何時是夢境，何時是現實」，Nolan回答話：「很簡單，有你的戲份，就是現實」。Michael Caine仲再三提醒觀眾，所有有佢嘅戲份，就係現實，無佢嘅戲份，就係夢境，而呢番話就係結局關鍵！
呢番話令一眾《Inception》影迷即刻重看結局，發現Michael Caine真係有出現喺最後一幕，換言之最後Cobb係返咗現實當中啊！
Michael Caine嘅一番演講，終於揭曉咗《Inception》8年嚟嘅謎團，各位粉絲終於唔洗再估估下啦！
其實8年間都曾有明眼人提及過，Cobb嘅陀螺圖騰只係掩眼法，真正嘅圖騰係手上嘅戒指。Cobb有戴戒指時係夢境，無戴戒指時係現實。
亦有好多網民以電影入面嘅截圖，解釋最後一幕鏡頭特意影埋Cobb嘅雙手戒指位，以證明無戴戒指嘅Cobb係身處現實。
小編認為應該真係無咁多巧合，戒指都可能係Nolan用以隱藏真正結局嘅其中一個手法，《Inception》可能仲有埋藏好多未知嘅細節位，不過如今得到演員嘅親自解釋，為結局劃上完美句號啦！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）