對工作充滿熱誠是好事還是壞事？這條問題沒有標準答案。日前，有網民於討論區發文指，新人同事完成一份Project，全因老闆一句「睇好你啦」，以為自己有上位的機會，隨後每日返工都努力博表現，甚至chur同組的同事，令該網民不知應否提醒新同事，助他認清現實。
撰文：經一編輯部｜圖片：Unsplash、香港討論區｜原文刊於：經濟一週
樓主：新同事畀老闆拍兩下膊頭 一句「睇好你啦」以為有上位機會
日前，有位網民於香港討論區以「個新同事畀老闆拍兩下肩講咗句『睇好你啦』就好似打咗針咁，成個人痴咗線 」為題發文，指新同事因為老闆的一句「睇好你啦」以為自己有上位的機會。
樓主指，老闆的說話只是場面話，不可信，惟那位初入職場的打工仔信以為真，在老闆說完那句話後，每日chur身邊的同事，努力發圍。樓主表示，那位新同事入職不久，更是第一份工作，不知應否打破他對返工的期望，助他認清現實，因而發文詢問廣大網民的意見。
新人必經階段？
帖文一出，引起網民熱議。有網民表示，因老闆一句鼓勵說話而努力工作，是新人必經的階段，不應提醒對方，消磨他的熱誠。
- 「每個新人階段！」
- 「必經階段，等佢撞下板，畀老細鬧鑊甘嘅，就會大個仔。」
- 「鼓勵新人啦！同埋可以畀晒啲嘢佢做。」
- 「你有實力就掂哂！佢無殺傷力對你嚟講，何必熄人團火呢？」
- 「新仔有啲火係好事嚟噃，有咩問題？」
- 「咁人哋有火咪由佢囉」
- 「有戲睇你唔買花生？你有咩資格叫醒人先？」
- 「老闆最鐘意用呢句呃新入職嘅新人，但你又唔好咁快同佢講，可能老闆背後睇緊佢表現。」
- 「你又唔好以自己嘅老屎忽心態，去消磨人哋後起之秀嘅決心！」
網民：主動提醒畀人以為立心不良 佢做多幾年嘢自然會明
又有網民認為，若樓主主動提醒或會被對方感覺立心不良，有人坦言那位新人同事只要「做耐啲」，自然會認清現實。
「有熱誠係好事，你又無必要主動打沉佢，反而佢會覺得你係壞人。慢慢同佢傾，傾下佢啲project嘅可行性。等佢了解返自己對人處事嘅細緻程度先啦！」
- 「唔好提啦，提完有可能仲覺得你立心不良，畀佢經歷下畀人睇好嘅感覺。」
- 「做多一兩年佢就化㗎喇！」
- 「好快熄，當佢發現老闆其實唔知佢叫咩名的話。」
- 「佢做耐咗就知㗎啦。」
- 「入世未深…遲點就會明白。」
- 「其實不用提醒他，讓他自己慢慢經歷一些，才會懂得社會的生活是怎麽樣的。」
- 「只要做多幾年嘢，磨練吓，佢自然知道咩事，保證hea做！」
老闆嘅「睇好你啦」同「下次飲茶」意思一樣
不少網民看完樓主的經歷後，表示自己曾在職場遇到相同的情況，直言老闆一句「睇好你啦」，同「下次飲茶」的意思一樣，只是場面話。
- 「呢句說話，同『下次飲茶』意思一 樣。」
- 「我老闆口頭禪。」
- 「可能樓主唔識，呢啲叫『熱誠』。所以呢個世界真係有種人，成世都只係搵嗰皮零嘢一個月。」
「無論邊一間公司大公司、中小企所有老闆門面做得好好體體，幫班新仔打支強心針，因為佢對公司有熱誠、有責任，3個月無問，過咗2、3年就會開始懷疑職場，自己當初有幾蠢。」
「我哋有個新人入來，老細都係講咗句類似嘅說話，跟住個同事就走去考車牌讀書之類，我出聲提佢話老細對個個都咁講，但係我覺得老細雖然畀假希望，但同事進修都係好事。」
又有網民表示，返工最怕遇到「真係好怕遇到呢啲傻仔，樣樣走去做，走去理。其實返工做返基本嘢，做返自己本份，已經好足夠」。有人卻表示欣賞這類年輕人，建議樓主可以扶持他，更認為「成功，係基於一份執著」。
網民：可能真係傻嘅先上到位呢
不過，有網民勸樓主多一事不如少一事，指他日或許風水輪流轉，那位新人同事分分鐘真係有上位機會。
- 「世事無絕對；有朝一日如果呢個『新人』做咗你上司……」
- 「可能真係傻嘅先上到位呢！分分鐘做埋你上司啊！」
- 「相對嘅。同打仗一樣，呢類人一係戰死，一係過多幾年就爬人頭。」