仲記得以前細個科技無依家咁發達，唔單止無智能手機，遊戲機亦都唔係人人負擔得起，不過當時嘅小朋友用一張紙，甚至連紙都唔洗就可以玩足一個小息！以下嘅小學雞遊戲唔知你又玩過未？
1. 過三關
玩法超級簡單，只要喺一張紙上面畫個「井」，兩個玩家一個畫「圓圈」，一個畫「交叉」，輪流喺「井」入面畫自己嘅符號，最先打直、打橫或者打斜連成一行嘅人就贏啦！
玩法咁簡單，一局極快結束，小編記得以前同同學玩成日都打和！
2. 東南西北
用正方形紙摺成四個角，上面寫「東」、「南」、「西」、「北」，入面寫八個指令或者騎呢形容詞，其中一人負責開合，其他人選擇方位同開合次數，最後打開就係對應嘅指令或者形容，好多時啲騎呢形容詞都令大家笑到傻㗎！
3. 天下太平
講到小息時間遊戲，點可以唔提天下太平？兩個人喺白紙上面分別畫一個四格堡壘，然後開始猜包剪揼，贏嘅人就可以逐一寫低「天」、「下」、「太」、「平」，跟住立旗，起保護罩、戰機等保護自己嘅堡壘。
由於要贏需要將對方嘅旗幟同埋「天下太平」四個字全部消滅，往往都要猜到天昏地暗，所以通常玩到最後都係分唔到勝負就夠鐘上堂。
4. 123紅綠燈
玩過呢個遊戲嘅人一定唔會忘記句口號：「123紅綠燈，過馬路要小心！」負責做鬼嘅人要扒喺牆邊大嗌呢句口號，其他人就要喺佢嗌口號期間向佢前進。
當鬼叫完口號之後擰轉頭，其他人就唔可以再郁，郁咗就要出去同鬼拖手，而如果有人掂到鬼，所有人都要轉身逃走，聽到鬼大嗌「停！」就要停低，等鬼行三步去捉人，被鬼捉住就會成為下一round嘅鬼。
呢個遊戲非常考驗大家嘅平衡力、專注力以及忍笑能力，如果唔係就好易被鬼捉到㗎啦。
5. 狐狸先生幾多點
呢個遊戲同「123紅綠燈」有啲似，不過嗌口號嘅人就係所有玩家，佢地要問負責做狐狸先生嘅玩家：「狐狸先生幾多點？」狐狸先生就會報出1－12點。
如果係1－11點嘅話，其他玩家就要行返相同嘅步數，如果狐狸先生答12點嘅話，就會跑出嚟捉人，其他人要逃過狐狸先生嘅魔掌，如果唔係就會成為下一任狐狸先生喇！
呢啲遊戲簡單得嚟又好玩，真係好適合喺課餘時間同朋友仔一齊玩。小編最鍾意玩狐狸先生幾多點，夠晒緊張刺激，大家又鍾意邊個遊戲呢？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）