娛樂圈近幾年確實熱鬧，除咗本身有一班藝人娛樂大家之外，佢地嘅星二代仔仔、女女都非常有娛樂性！雖然佢地唔係娛樂圈人，但從一班明星父母嘅ig都見到呢班迷你星二代嘅蹤跡，儲埋儲埋都唔少粉絲㗎！唔經唔覺，呢班迷你星二代已經2歲，即係要開始返PN班，即係要返學！即係要準備同父母分開喇！以前，通常小朋友返學都會有「分離焦慮症」，即係一定喊到拆天，唔想離開父母……不過，小孩你太天真了！而家呢個年代，有「分離焦慮症」嘅其實係父母本身呀！
黎諾懿仔仔小春雞搶住開門返學！
黎諾懿和太太李潔瑩Nicole嘅仔仔黎峰睿(小春雞)2017年4月出世，貶下眼已兩歲幾，要返PN班了，踏入要孭書包上學去嘅人生階段。
其實黎諾懿一直與仔仔感情非常好，休息時間會帶小春雞周圍去玩就唔洗講。
平時拍劇超忙碌嘅佢，收工返屋企都會陪小春雞，絕對係個稱職嘅超級爸爸！
不過，小春雞似乎唔係好care爸爸，第一日返學就搶住要開門返學，唔知此舉有冇傷到爸爸心呢？
之前諾懿喺ig分享咗小春雞嘅第一張學生相，見小春雞身穿白色校服，睇起上嚟真係愈大愈似黎諾懿，唔知大咗佢會唔會同爸爸一樣做演員呢？
陳敏之等仔放學勁不捨！
上星期陳敏之嘅2歲兒子雷子樂(Eddie)已經開學，當日敏之仲好興奮㗎，仲喺ig分享仔仔著上校服嘅相片。
點知到Eddie返學一星期之後，敏之竟然喺ig po咗一張佢素顏坐喺餐廳入面，等緊仔仔放學嘅相，加埋佢嘅caption，就知佢確實百般滋味在心頭。
敏之經常都會陪仔仔周圍玩，因為佢自己都認同「陪伴是最好的禮物」
小朋友可能會好開心收到禮物，但物質總係有限，父母嘅愛和陪伴先係永無止境！
之前佢拍《到此一遊—台北》嘅時候爆喊，話勁唔捨得個仔，就知佢有幾錫自己個心肝椗！
所以佢見到個仔返學又冇喊，仲要同佢hi-five，佢係放心，但又百般不捨，畢竟小朋友係由自己條腸出嚟，又想佢快啲長大，但又唔捨得佢咁快長大嗰種不捨和矛盾，相信作為家長一定明白！
黃伊汶母子分離sad到講前世今生
黃伊汶（Emme）與人稱「小龍」嘅陳國坤嘅仔仔陳真，今年都3處人仔，已經要返K班，正式上幼稚園，即係正式步入人生要認真讀書吓階段。小朋友嘅升學問題，相信會係大部分香港家長最大嘅憂慮。
不過Emme就明白到香港小朋友嘅學業壓力，所以早前都喺ig po咗個帖寫：「不要逼他們跑得太快，他們有一生的時間好好學習。快樂就好」，希望都可以提醒現今香港嘅家長。
雖然身為媽媽嘅Emme喺小朋友學業方方面好開通，不過佢其實同一般家長一樣，對於小朋友要上學去，都係萬分不捨，仲sad到擺咗文學家龍應台上檯：「人生充滿一去不返的背影與目送，所謂母子一場，只不過意味著，和他的緣分就是今生今世不斷地在目送他的背影漸行漸遠」。其實都只係返學啫，Emme又唔使咁感慨嘅~
有說「女兒是爸爸的前世情人」，咁仔仔一定係媽媽嘅前世情人，早排母親節陳真代爸爸送花俾Emme，Emme sweet爆！看來爸爸都冇地位了~
為人父母嘅，見證小朋友一日一日長大，大到快要離開自己，真係既喜且悲。
車婉婉眼濕濕打千字文
高齡產婦車婉婉以42歲之齡誕下兒子Justus Quinlan（BBQ），今年2歲幾嘅BBQ今個星期都正式開學了！
因為千辛萬苦先生到仔仔嘅關係，婉婉對於仔仔絕對係緊張大師，之前有訪問都有講過佢生咗BBQ之後冷落咗老公，成日同老公吵大鑊！
到BBQ正式返學，婉婉更情緒大爆發，仲喺ig po相話自己「非常不捨」！
仲講到話知道自己「不能無時無刻的在你身邊遮風擋雨，諗到依度都有d眼濕濕」，真係陰公豬！之後仲話「我有理由相信，呢段適應期係學校安排比我嘅」。冇錯，其實小朋友上學去，最不捨嘅其實係父母本人，爸媽們要有Big heart呀！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**