北歐魚湯與肉丸
魚湯同肉丸同幾乎係小編在芬蘭同瑞典食得最多嘅北歐菜式。魚湯方面，其實整個北歐國家都會飲到，只係唔同國家有唔同做法。而係芬蘭，好多間餐廳嘅奶油三文魚湯都非常出名。至於去瑞典就必定會食番幾粒肉丸，所以今次就介紹幾間四間好食餐廳比大家。
1) Restaurant Story
第一間要介紹嘅Restaurant Story係一間位於赫爾辛基魚市場入面嘅一間Cafe。
Restaurant Story除咗有魚湯賣之外，仲係一間餅間店，早餐嘅時間我係呢間Cafe買咗一個北歐傳統餅派-肉桂派係前往芬蘭堡嘅船上食。到回程嘅時候就去番間Cafe飲佢最好飲嘅Creamy Salmon Soup。
傳統芬蘭奶油三文魚湯做法好簡單，只要將三文魚扒煮熟，再加入奶油、薯仔、紅蘿蔔就已經完成。而Restaurant Story一碗三文魚湯賣13.99歐元，大概等於130蚊港幣一碗。看似「貴價唔飽」，但其實一個人飲完之後又會「飽到上心口」，因為碗魚湯好大碗，而且會配埋麵包，仲有好多「湯渣」，一邊飲湯一邊食埋啲魚肉同薯仔，點會仲唔飽呀。
Restaurant Story
地址：Vanha Kauppahalli, Eteläranta, 00130 Helsinki, Finland
2) Restaurant Kajsas Fisk
第二間要介紹嘅魚湯就要去到瑞典斯德哥爾摩先飲到。 Restaurant Kajsas Fisk位置於瑞典斯德哥爾摩市中心一間叫Hötorgshallen嘅美食廣場。入到廣場記得坐電梯去地下一樓，見到好長人龍個間就係你要搵嘅目標。
雖然都係魚湯，但同芬蘭嘅奶油三文魚湯完全不一樣嘅味道，因為Kajsas Fisk嘅魚湯用嘅材料完全唔同。呢間瑞典魚湯味道較酸，以番茄作為基底口味，材料就用上時令嘅魚肉、蝦肉同青口，真係每一啖都係充滿海鮮嘅味道。仲有不得不提係湯面嘅自製蛋黃醬，個醬令到成碗魚湯飲落濃郁美味。
呢碗咁好飲嘅魚湯，價值130SEK，即係等於120蚊港幣。同樣地都係非常抵飲，因為飲完一碗還仲可以添多半碗，職員除咗加湯之，仲會再加埋魚肉，另外佢仲有沙律同麵包任食，其實個日我飲咗一碗未到已經「飽到上心口了」。
Restaurant Kajsas Fisk
地址：Hötorgshallen 3, 111 57 Stockholm, Sweden
3) IKEA總店
講完魚湯，另一樣成個北歐都會食到嘅菜式就係肉丸，但點解講起肉丸，我地會諗起瑞典肉丸？除咗因為我地香港有IKEA之外，都因為IKEA係全世界最大嘅家具零售商，IKEA係電視上賣廣告，世界各地嘅人都自然因從IKEA廣告而認識北歐肉丸。
既然IKEA將北歐肉丸發揚光大，我點可以唔去一去斯德哥爾摩IKEA基地，試下瑞典呢邊嘅肉丸同香港IKEA嘅肉丸到底有咩分別。
要去呢間首都最大嘅IKEA都要少少時間，因為佢位置市郊，如果坐唔到佢免費接駁巴士，就要先坐紅色線地鐵，坐40分鐘到Skarholmen T-bana站，再轉740巴士坐5分鐘就到。不過巴士班次唔多，我個日去到IKEA係行番去地鐵站，步行要15分鐘。
好啦，去IKEA重點緊係要食肉丸啦。一入到IKEA坐電梯上三樓先會見到好大間IKEA餐廳，入面就已經可以食到肉丸。呢到食肉丸價錢有39/49/59SEK，分別係8/12/16粒肉丸。呢日我揀咗49SEK有12粒，大概55蚊港幣。食完之後個感覺就係「冇分別」(笑)。肉丸同樣都係冇得揀咩肉，肉丸會配埋薯泥、青豆、紅莓醬。
雖然冇分別，但係瑞典黎講，一餐晚餐去餐廳食要大概200蚊港幣，對窮遊嘅我黎講呢間肉丸絕對抵食。
IKEA總店
地址：Ekgårdsvägen 2, 141 75 Kungens Kurva, Sweden
4) Meatballs for the People
最後一間要介紹嘅餐廳就係貴價版IKEA。我講緊嘅就係同樣食肉丸聞名嘅本地餐廳Meatball for the People。餐廳位置於Sodermalm島上寧靜小區，可以坐地鐵綠線，到站行15分鐘就到去到。餐廳係瑞典都算出名專食肉丸，所以就算午餐去食，價錢都唔平。
如果同樣8粒瑞典肉丸，IKEA賣緊40蚊左右，而Meatballs for the People就賣緊238SEK，即係大概250蚊港幣，價錢相等於IKEA嘅六倍價錢。如果你問我味道有冇IKEA 肉丸六倍咁好食?我會答你冇，但我覺得黎到瑞典，點都要試一間出名嘅肉丸餐廳，你先會知道咩叫好食嘅肉丸。
而呢250蚊，我覺得都算抵比，因為餐廳嘅環境好好，我最中意佢有一人自修枱咁嘅座位。餐廳嘅肉丸都係當日早上先整好，保證新鮮，其他配菜都亦都係真材實料。呢日我早上11點去到成為佢當日第一位客人。餐廳當日有8種動物丸肉可以選擇，而我就揀咗佢最貴但可以一次過食到佢四款肉丸。
製作咗20分鐘，上菜個時餐廳好細心咁插上四款肉丸嘅旗仔，等食客可以知道食緊邊四款肉丸。今日廚師精選咗豬、牛、雞、駝鹿各2粒肉丸，而當中最特別緊係駝鹿肉丸啦，口感有啲似牛肉。每種肉丸都放入唔同嘅香料製成。除咗肉丸，碟上仲有薯泥，酸青瓜片同真正紅莓粒新鮮寫煮成嘅醬。建議先個別肉丸食一啖試試原味，再配埋酸青瓜紅莓醬食，感覺完全唔同。
Meatball for the People
地址：Nytorgsgatan 30, 116 40 Stockholm, Sweden
**Follow us on:
Facebook: Flyday.hk
Instagram: @Flyday.hk
訂閱電子報: Flyday.hk**