講到男女交往，好多人都係外貌協會，總係希望搵個靚仔靚女拍拖，但凡事都可能有例外。有港男分享女同事的感情煩惱，女方遭到男朋友提出分手，理由唔係變心有第三者，而係覺得女朋友太靚女，唔適合作為結婚對象。不過，就算依個係真實原因，唔少網友都暗笑依位男朋友實在太天真。
撰文：Yin｜圖片來源：高登討論區截圖、電影《紀念日》劇照
男女拍拖分手，理由可以有千百萬個，但如果嫌女朋友太靚都係原因，就確係「黑人問號」。有港男就在高登討論區分享女同事嘅感情煩惱，女同事日前同港男食晏，忽然自爆喺12月中已經分咗手。
男朋友去婚禮成感情轉捩點 令女同事被飛
這位女同事之前同剛剛分手的男朋友一齊咗幾年，感情一直都幾好，但男朋友去朋友婚禮，就成為兩人之間的感情轉捩點。男朋友當日出席婚禮之後，對女同事就突然變得好冷淡，過多三日甚至提出分手。
分手過程都算和平，雙方都好冷靜，並無大吵大鬧。不過，女同事當時就問：「可唔可以俾個分手理由我？」
估唔到嘅分手原因：嫌你太靚女
估唔到，男朋友竟然係嫌女同事太靚，佢話：「嗰日去完婚禮，我發現朋友老婆個樣普通到唔普通，甚至屬於醜樣。但我識佢咁耐，佢條條女都正到暈；我老死話靚女都不適宜結婚，只有普通樣先娶得過，唔駛受氣，唔駛怕戴(綠)帽。」
男朋友聽完老友嘅選擇心得，簡直如夢初醒，仲話：「佢(老友)點醒咗我，所以我諗落，我哋都係唔係咁適合㗎啦…我覺得我都係搵返平平凡凡嘅女仔好過。」
就算係外貌協會，分手理由一般都係嫌對方唔夠靚、唔夠吸引，嫌女朋友太靚而分手，確實係相當少見。女同事亦都話，聽完男朋友解釋，都唔知好嬲定好笑。偏偏，男朋友好認真，結果兩個人就咁分手。
女同事真係咁靚女? 港男話其實唔係好靚
可能好多讀者都睇到「黑人問號」，但更搲頭嘅係港男本人。雖然畀男朋友「嫌太靚」，但港男認為女同事就算係靚女，但都不至於靚女到咁誇張要分手，部分男同事甚至唔認為佢算係靚女。女同事本身亦唔算花枝招展嘅類型，應該唔關大花筒打扮嘅問題，所以最後都係無答案。
以為靚女先大脾氣唔專一? 網友笑太天真
對於女同事男朋友嘅想法，唔少網友都認為係太天真，「娶個醜就以為唔駛受氣同戴帽咩」；亦有網友估計，男朋友可能係悟出人生道理，於是決定揀個樣貌普通，但有錢嘅女仔，至少可以奮鬥少幾十年，又或者係寧願搵個身材好。
原來「靚女有罪」 網友對結唔到婚惚然大悟
有唔少網友都講笑咁「惚然大悟」，明白自己點解情路坎坷、結唔到婚，就係因為自己太靚。