突然間，大家都開始跑步喜歡跑步，跑會跑班紛紛成立，由精英跑手運動品牌以前運動店舖皆創立自己嘅屬會。各有賣點各有睇頭!
過去一年，各跑會就如武林各大門派，於港九新界運動場鍛鍊習武，恆常班越野班雞精班養生班，五花百門應有盡有，埋嚟跑埋嚟揀，學費有平有貴，豐儉由人任君選擇 ! 唯獨「Gone Runner」呢一門派無嘢你揀，獨沽一味，專攻「interval」，而且免費。再串啲，免報名免申請免中介免茶錢，逢星期二晚七點香港仔黃竹坑運動場準時上線，遠望一堆為數約六七十人嘅跑友，就係佢哋。無論閣下係一條友定一班 friend，唔好怕醜唔使尷尬，無人點名甚至可以話無人理你，自行上線一齊操練，熱血自備 !
有返咁上下嘅跑友都深明「interval」之奧義，但同樣深深領會其煎熬，讓人既愛且恨。「Gone Runner」深明此道，獨自苦撐不如一齊拚搏，人多勢眾，一人一團火足以燒旺6條track。就係咁，逢星期二晚嘅香港仔黃竹坑運動場，一班可能互不熟稔只有每周二相聚一次嘅跑友，哪管10隻800好、20隻400好、跑樓梯好，望望前後左右，唔使講嘢，各人眼神裡似乎就只有「唔使快，最緊要食得晒」，捱過呢粒鐘，頓覺自己好L勁!
跑界山界嘅裝備L無理由唔識位於灣仔嘅「Gone Running」運動用品專門店，老闆乃同樣縱橫跑界數十載兼獲獎無數嘅精英跑手 Joejoe 及其丈夫Peter Hopper。「Gone Runner」正正由佢哋創立。每周二嘅program就係由Peter 精心安排。
講明先，「Gone Runner」其實唔係跑班，亦無教練，只有兩位不收分文且單憑一夥熱血，於過去十數載風雨不改仗義相助嘅領頭 pacer – 縱橫跑界數十年嘅霸哥(Rocky)同鍾哥。霸哥帶B組，鍾哥帶C組，A組呢 ? 無人駕駛，快腳自己嚟 !
總有一啲喜歡跑步嘅人就係咁神，咁值得尊敬。十幾年嚟兩位不求回報不望回禮，比返工更專注更認真更盡責，夏天30幾度冬天幾度，滂沱大雨以至3號風球，不遲到不欺場不缺席，就為帶好呢個披。除咗因為好很熱愛跑步，根本無從解釋。當晚所見，薑確係越老越辣，霸哥同鍾哥嘅披醒穩定得無話可說。有貨嗰晚跟霸哥組，見攰就跟宗哥組，快定慢定hea，你話事，但無人話你，有無盡力自己知。但弔詭嘅係，你深知嚟得「Gone Runner」就係為咗向可惡嘅interval挑機，仲要有幾十人與你並肩挑佢機，你就係想克服佢，打低佢，至少要打和，你點可能容許自己hea?!
The post 尋找跑會的故事 #20 | Gone Runner 平嘢無好? 咁免費又點睇呢? appeared first on Fitz 運動平台.