【搵食CONY】生日留家嘆半成品外賣　5分鐘煮出餐廳級美食

Happy Birthday to me……冇錯，今日係可愛迷人嘅CONY生日呀！不過基於疫情關係，今年冇得同一大班LINE FRIENDS慶祝生日，唯有留在家中食燭光晚餐。有玩開《熊大上菜》嘅朋友都知熊大入廚了得，不過貼心嘅CONY又點捨得熊大咁辛苦一腳踢？咁啱發現觀塘西餐廳「登堂」推出咗「半成品」外賣，幫你準備好食材，並聲稱只需要5分鐘就煮好一道菜。講到咁容易，出名手殘嘅CONY決定一戰，順便可以同熊大一齊玩煮飯仔（心心眼）。

外送食材　調味品都準備好

到底咩係「半成品」外賣？簡單嚟講，你照可以挑選餐廳內的心水菜式，但送到嚟嘅唔係完成品，而係各款新鮮食材，不但預好份量，甚至幫你切好、醃好、解凍好，太複雜花時間嘅部分仲要幫你煮好，如燴牛膝和肉醬等，只需簡單翻熱，或利用簡單的煮食工具，跟足步驟網上教學好快完成。今次CONY就揀咗兩款做緊特價嘅「澳洲M5和牛肉眼扒」和「鮮魷魚自家製手造寬條麵」，以及「香烤雞中翼配泰式羅望子醬」。

服務提供網上訂購，現時餐廳提供約30款菜式，由前菜、小食、意粉、主菜及甜品等一應俱全，而且主打上乘食材，在家都可輕鬆煮出餐廳級數的料理。

每款菜式於網上都有教點煮，有些菜式甚至有教學短片，大家可以參考下，因應自己的廚藝再決定買唔買。

煮食過程大公開

基本上烹調以上3道菜式難度不高，而且需時不長，每道菜花了10至15分鐘便完成。不過因為CONY今次揀選的菜式都要用平底鑊烹調，而家中亦只得一個平底鑊，所以就要逐道菜烹調，開餐時有啲菜式或會凍咗，所以CONY提提大家選擇的菜式盡量不要集中使用同一款廚具。

總括而言，平時西餐叫外賣拎到返屋企好容易凍晒冇咁好食，但係生日、節日想在家食好啲慶祝，自己煮又唔想準備太多嘢，呢個「半成品」外送服務係唔錯嘅選擇，唔止簡單易煮，配備埋隻靚碟，放上餐廳為你準備好嘅配菜，再排靚幾隻雞翼、放塊牛扒上去，就算係CONY呢啲又想煮但又手殘嘅人士都可以煮出好似餐廳質素嘅美食。唔講咁多，CONY慢慢享受燭光晚餐先啦，下次再同大家分享！

登堂
地址：觀塘興業街4號The Wave 2樓
電話：2110 4103
網址：www.dthc.com.hk