政Whats噏：黃之鋒結束美國唱衰香港之旅　羅冠聰接力上場

香港正值多事之秋，更有人落井下石頻頻「告洋狀」，實行唱衰香港，最近曝光率最多一定係被內地官媒批評為「新生代漢奸」嘅香港眾志秘書長黃之鋒。雖然黃已經結束美國唱衰香港之旅，但喺宣誓風波中被褫奪立法會議席嘅香港眾志常委羅冠聰決心接力，真係驚死香港唔夠亂，有時事評論員就嘲今次輪到禍港配角上場。

修例風波持續超過一百日，示威者同部分政治人物都積極爭取國際社會關注同支持，好似爭取美國通過《香港人權與民主法案》，其中黃之鋒同羅冠聰早就飛到美國進行游說，前者更率先喺上星期出席美國國會聽證會，促請美國國會通過香港人權法案，又借機力數呢三個多月香港所發生嘅事情。

雖然黃已結束訪美行程，但唔代表唱衰香港行為同樣告一段落，事關佢就話居於東岸嘅羅冠聰會繼續同美國國會幕僚保持聯繫，推動有關法案嘅立法進程，證明佢亂港嘅行動仲未停。

至於羅冠聰亦都喺網上講明要「接力游說」，事關佢本周會出席美國參議院外交事務委員會嘅東亞小組聽證會，到時又會再講香港議題，直言要延續今次美國行程嘅成果喎。

羅冠聰更口出狂言，直指過去一行人被鬧無數次漢奸、叛國，但呢啲污名化對佢哋嘅影響愈嚟愈細喎，仲話今次行程令到好多本身仲猶豫係咪支持聯署嘅美國國會議員落水，鎖定咗好多參眾兩院關鍵議員嘅支持。

時事評論員陳雲生直指美國干預其他城市或國家時都有一套劇本，但劇本需要有當地人嘅配合去增加說服力，好似過去就經常搵曾被官媒點名批評為「禍港四人幫」嘅民主黨(白鴿黨)創黨主席、有「李漢奸」之稱嘅李柱銘、有「民主阿婆」之稱嘅前政務司司長陳方安生，現時只係轉向年輕人埋手而睇上黃之鋒，而主角外仍要有配角幫忙，所以就輪到羅冠聰上場。

陳雲生認為市民已經睇厭咗佢哋嘅把戲，而且稍為有人生經驗就知道佢哋所為係行唔通，大彈港府教育失敗，令到現今一代年輕人輕易畀外國利用。

東網網站 : https://on.cc/

東網Facebook專頁 : https://www.facebook.com/onccnews/