【不滿被飛】借網民留言寸爆公司 陳偉琪：冇雷珍妮寧願唔睇

「細龍太」陳偉琪（Vicky）早前涉醉駕後，再被拍下跟外籍男喺夜店親熱、吸煙兼飲酒，被指形象唔好，而被飛出《愛．回家之開心速遞》劇組，劇情交待「細龍太」因愧對龍家和老公而出走，打後暫未有開工通告。
 
被雪嘅Vicky連日來喺社交網貼文狂呻，語帶相關留言：「會有一些人永遠不會了解你。你的工作不是為他們。」、「你很漂亮，被誤解了，為甚麼你要像鄰居一樣？」、「唔通我喜歡寫作又話你知咩？」、「未知是自我開解，還是認為不用向別人解畫。」…噚日Vicky再發功，喺IG限時動態先貼了一張天朗氣清，海天一色嘅風景相，然後再上載網民留言截圖表達不滿：「冇雷珍妮我寧願唔睇─TVB愛回家等摺埋喇！」該網民還表示：「我就鍾意廢柴老公兩公婆。」雖然Vicky冇留評語，但佢嘅心聲，大家明晒啦！