一個耳熟能詳嘅英國品牌 – MG最近以電動車重返香港汽車市場。MG喺2007年時被SAIC中國上汽集團收購，現已成為中資英國汽車品牌，但今次到港嘅電動版ZS就十分有驚喜，除咗價錢平過好多現有電動車之外，包裝上都好有誠意。
由富利堡集團取得本地代理權，本月起正式開賣嘅全新ZS EV電動車，當中有入門Business版同香港主要入口嘅頂級Premium版，建議售價連稅分別為$266,925起及$297,723起，如買家符合「一換一」資格，車價就分別降至$228,185起和$244,743。
ZS EV配上44.5kWh三元CATL鋰離子電池組，利用一副永磁摩打驅動前軸，馬力有143ps、扭力達36kgm，0至100km/h靜止加速只需8.5秒。相對其他電動車嚟講，雖然加速力比較慢，但同時亦都表示對於現時「太快」嘅電動車嚟講，新手駕駛者就會比較容易去操控。經筆者測試之後，認為絕對有2.0升汽油車嘅性能表現。
外觀方面同汽油版ZS無太大分別，主要係鬼面罩會變成充電位置，而呢方面亦會令零件更加容易更換。代理表示，現時保險方面以60%NCB計算全保，只需五千零港幣就可以，比起主力電動車品牌平好多，相信會因為咁吸引更多新買家。
車輛有三種駕駛模式，調教到Sport模式反應明顯大大加強，避震同軚感都會更加Firm。同時都有三種KERS動能回收級別，而為咗同汽油車有更近距離嘅體驗，即使用到第三級KERS都唔會有好強大嘅拉扯感覺。
內籠方面以大量皮革去包裝，感覺媲美歐洲入門房車，尾箱容量達470升，摺起後排座椅就可擴展至1,100升，無論一家大細去郊外定日常使用都好足夠。
而續航力方面，廠方指城市行車WLTP標準可達372km，據代理在本地路況長期試駕，充滿電日常路況平均續航距離都接近300km。充電方面，若使用家居220V/13A電源，充電需時約20小時；商場中速7kW約需6.5小時。如果快速充電嘅話，40分鐘都可以充到80%電量。
啱啱代理話如果呢排落訂，最快可以六月左右交車，而喺小編試車嘅一小時入面，旁邊嘅sales已經收到四個電話想試車同落訂，睇嚟車價同配套上都真係好吸引喎!