政Whats噏：何俊賢鬧爆暴徒　話香港跌入「量子騙局」

立法會今早(21日)繼續討論休會待續議案，唔少建制派議員都借機炮轟現時「黑衣暴徒」對社會嘅破壞。有議員形容香港好似跌入咗「量子波動政治騙局」，呼籲政府要盡快將犯罪集團拉倒！

漁農界立法會議員何俊賢喺發言時，首先提到早前有新聞報道內地嘅「量子波動速讀」騙局，交萬四蚊學費就可以容易啲搶到演唱會飛、買彩票會中獎，質疑咁嘅嘢都會有人信，而佢就話現時香港嘅情況正正符合晒呢種騙局，只要有一大堆唔知咩嘅理論，當中加少少聽得明又好好聽嘅理論，再形容到可以從中得到巨大利益，就會有好多人信。佢仲叫香港政府應該要好似內地政府咁，要盡快拉倒依家嘅黑衫犯罪集團！

至於旅遊界議員姚思榮就陳列多項數據，指呢幾個月嘅示威由和平演變成暴力衝突後，旅客大跌超過40%，大幅影響本地酒店、食肆同零售商嘅生意，旅行社好大可能出現倒閉潮，姚不禁反問：「香港以往係世界最安全，但係依家點啊？」

東網網站 : https://on.cc/

東網Facebook專頁 : https://www.facebook.com/onccnews/