早幾日港台宣布今年唔搞「第42屆十大中文金曲頒獎禮」，投票就照做，最後會整個特備音樂節目去總結今年樂壇成績同埋頒獎。之後新城電台亦都宣布唔搞新城勁爆頒獎禮，改為搞「流動突擊式頒獎」。有觀眾喺呢個page留言，大意係話搞嘅話都唔知可以頒畀邊十首，因為講唔出今年有咩歌。喺呢半年風雲變色嘅時勢，係會少咗留意娛樂嘢，但唔代表香港樂壇冇歌出冇人做嘢。撇除社會氣氛嚟講，問題係根本冇音樂節目用力推當代「現役」歌手。
咁啱ViuTV上兩個星期開始推出新音樂節目《CHILL CLUB》，搵返原唱歌手出嚟唱經典歌，主持方面仲要有之前主持過《流行經典50年》嘅湯寶如，同TVB《經典》對戰嘅意味都幾明顯。雖然《CHILL CLUB》啲經典歌手比起《50年》後生得多，不過計埋77台由TeddyRobin主持嘅《點指Band Bang》，重點都唔係放喺當代「現役」歌手度。
睇返現有嘅音樂節目。無綫以往嘅皇牌《勁歌金曲》已經愈做愈差，反而《樂勢力》、《Music Café》相比起嚟仲有生氣心機，主持問嘅嘢有時仲深入啲，似乎應驗咗早幾年大台綜藝科主腦換人時一度傳出要削弱《勁歌金曲》地位嘅傳言（傳言仲話要摺埋《香港小姐選舉》）。不過拎返呢幾個音樂節目同《流行經典50年》對比，佢哋嘅播放時段、舞台效果、主持份量都弱得多。
無論你鍾唔鍾意睇電視都好，電視台仍然係香港流行文化嘅主要傳播渠道之一，而佢哋嘅集中傳播力量現時仲係大幅拋離網上渠道。電視台將資源放晒去做以「經典舊歌」為題材嘅音樂節目，我認為係唔妥當。當然係有一班喜歡舊歌嘅觀眾，前輩歌手亦都親身示範咩叫寶刀未老，佢哋值得有個節目有個平台，但以長遠發展計，一定要畀啲機會當代歌手去唱去表演，香港樂壇先可以繼續發展落去。
無綫到底係咪想繼續發展我睇唔透，但依家ViuTV都投放咁多資源去搞個經典舊歌節目《CHILL CLUB》，我諗主要原因都係見到無綫《經典》有一定收視，如果宣傳得當係可以吸到一啲觀眾，何況《CHILL CLUB》喺星期日播，避開咗星期六播嘅《流行經典50年》，唔使直接爭觀眾，就容易做得多。當然兩個節目都有「以舊帶新」同埋「潛力歌手/素人」嘅環節，但比重佔幾多大家有眼見。
香港真係有好多好聽嘅歌同埋好畀心機嘅音樂製作人，係冇大啲嘅平台畀佢哋宣傳表演。依家化整為零，各大音樂平台會搞音樂會，歌手出碟會搞好多嘢喺網上宣傳。以今日出實體碟嘅許廷鏗為例，之前〈我們與愛的距離〉搵咗勁多朋友歌手喺YouTube、IG對唱，之後又搞新碟優先表演，今日仲做埋唱片店快閃簽名，落力做到盡，但如果有個大平台就會事半功倍。最近呢兩三個星期仲有陳蕾、林二汶、馮允謙、黎曉陽推新歌新碟，個個都係正嘢。到底香港樂壇係冇人做嘢，定係冇渠道畀佢哋去發表，其實好明顯啦。
或者你會問推動樂壇嘅責任，關電視台鬼事咩？如果電視台唔當自己係香港流行文化嘅推手，拎得公共資源大氣電波但又可以唔做嘢，咁就真係唔關佢事嘅，吓嘛？ 撰文：方以文（ ig: @fongemantvman）