王祖藍揚言永久退出《開心大綜藝》！搵「年輕人偶像」曹永廉蘇永康主持新節目？

昨晚（4月18日）《開心大綜藝》特別加長時間對戰ViuTV首個音樂頒獎禮《Chill Club 推介榜年度推介20/21》，節目繼續以「扮嘢」、「搞笑」吸引觀眾，節目接近尾聲時有自踩的《公關災難頒獎禮》，當中特設一個「最災難藝人獎」，由創意官王祖藍獲得。

王祖藍未能現身攞獎，透過短片發表講話：「上星期製造咗一個好大嘅關公災難，所以我要自我隔離，繼續食返我當年獎門人贏返嚟未食嘅花之戀壽司，好好思考我哋節目方向，有好多網民話我哋做返當年福祿壽，我哋要深切反省。我唔應該叫陸永上台，我應該叫李思捷返嚟，李思捷對唔住，我哋嘅副總經理（指曾志偉）亦責無旁貸，佢冇講過蘇永康同曹永廉係年輕人偶像，但經網民改圖，一言驚醒夢中人，我哋會搵佢兩個返嚟聯同另外兩位年青偶像，胡楓同羅蘭姐主持新一輯後生仔傾吓偈，探討年青人話題，睇到大家嘅意見之後啟發我開新節目《廁所辦大事》，深入探討馬桶文化，繼續研究充份發揮抽水功能。」

王祖藍更揚言永久退出《開心大綜藝》：「我決定永久離開《開心大綜藝》呢個舞台，衷心多謝台前幕後，兄弟姊妹們，希望你哋愈做愈好，我希望你哋永遠懷念我。」不過，其實王祖藍並非永久離開節目，只是玩「自抽」營造節目效果。