歌手張敬軒「過大海」舉行13場演唱會,昨晚(15日)舉行首場,英皇集團主席楊受成及太太陸小曼率領旗下藝人沈震軒(Sammy)、艾妮(Elly)、黎展峯(Andy)、洪助昇(Aiden)、黎峻(Kenneth)及劉若寶(Polly)齊捧場。
軒仔以《迷失表參道》及《酷愛》為演唱會打開序幕,氣氛瞬即燃爆。唱完兩首歌後,除了多謝每一位撲飛的朋友,更謂要多謝每一位肯將自己門票賣回給他的有心人,全場立即歡呼,更大聲宣布:「我終於夠飛啦!我老母……唔係,我阿媽……,自古以嚟,由京劇開始,媽媽係稱之為『老母』。我阿媽終於唔使日日好似唐僧對住孫悟空『咦咦哦哦……』,多謝每一位去到上環歌迷會中心同我哋交收嘅朋友,希望我秘書冇嚇親大家,佢個人比較嚴肅啲。我必須要喺今晚第一晚開Show多謝佢哋。」
軒仔表示自己最初構思是要將今年3月於英國倫敦Royal Albert Hall演唱會中,最精彩的部分保留,同時亦要做新的表演:「希望大家可以集中少少精神去睇我哋重新編排嘅作品,我每次嘅演唱會,都希望將自己過去學到嘅、或者諗到嘅一啲情緒、一啲畫面,喺舞台上面呈現畀大家。」提到早幾日是他中學校慶,由於要籌備是次演出,所以未能出席,但看到同學們傳給他的相片,令他想起中學時一份甜蜜蜜的「初戀」:「嗰個階段唔知係咪因為青春期嘅原因,我第一次對一個人有咗感覺。」首次分享自己的甜蜜往事,全場歌迷即時起哄,「我係學生會,佢喺另一個學生組織嘅團委,我哋成日一齊做好多學校入面嘅課外活動、校運會、School Radio嘅轉播。但細個嘅時候媽媽管得好嚴,成日都講『你唔好早戀呀、唔好拍拖呀。』我哋成日喺學校嘅一棵百年歷史嘅大榕樹下面溫書、食嘢,我喺度諗『如果當時夠勇敢開口去話畀你聽我鍾意你。』嘅話,我依家嘅人生會唔會好唔一樣呢?」
演唱會上,他不時跟歌迷互動,除了大合唱《斷點》、《Hurt So Bad》及《只是太愛你》,又跟他們遙遠握手,「握手」期間更乘機拉票:「請投《隱形遊樂場》一票!」引得全場大笑,又說:「今晚我哋有幾千名觀眾喺度,所以我都要趁機喺度拉吓票,我首歌已經入咗《叱咤樂壇頒獎典禮》10強啦!跟住就會開始投選五強,大家投多我一票好唔好呀?多謝。如果我今年有得上台嘅話,我會特別多謝呢度嘅朋友。」。
他又提到身處娛樂行業22年,時間飛逝,接着純粹問00後的歌迷請舉手,誰不知眾多歌迷舉手,先是2012年出生的歌迷:「12年!你知我係邊個呵?我唔係林家謙喎,我叫咩名話?(該名歌迷大叫張敬軒)錫晒你!我有12年嘅fans呀!」隨後又有2014年的Fans現身,他又驚訝:「吓?呢度又有一個呀?14年呀?嘩!多謝你!叫我哥哥得㗎啦。」另一邊觀眾起哄,軒仔笑說:「人口普查呀依家?」他望向遠處,只見一名小朋友揮手,便問到:「你幾多歲呀?6歲!即係(20)17年,嘩!好嘢喎!你都做得我孫啦喎。我應該係呢個行業現存第一個『爺級』歌手,你好有Taste,一定會成為社會棟樑,因為你聽我嘅歌。」
演唱會來到尾聲,在唱出當晚最後一首歌《櫻花樹下》前,軒仔透露他的婆婆入了ICU,他希望將這首歌送給婆婆及自己:「以下呢首歌以往我都會送畀觀眾,但我今晚好想送畀自己。演唱會之前,我有個屋企人今晚喺ICU,係我嘅婆婆,雖然我哋冇直接嘅血緣關係,因為我媽媽係孤兒,佢係收養我媽媽。我好想將我哋今晚咁多現場觀眾嘅愛、大家集氣,佢仲有兩日就生日啦,好想佢可以渡過呢個難關。以下呢首歌,我送畀自己,亦都送畀婆婆。」
東網網站 : https://on.cc/東網Facebook專頁 : https://www.facebook.com/onccnews/