成績：
3:16:01，冇咩練嚟講算有交代。4 月頭先決定去馬，得兩個星期練，得兩次長課，3 月得果 210K。前半 pacing 唔錯，有少少諗過衝 PB，但好戲在後頭，少少飲恨唔俾多兩錢力，差 0.01 秒叫唔到 3:15! 哈哈哈！
氣氛：
一流！由頭到尾都有人打氣，有小朋友、有出名的女大學生、有 Spencer 狗狗啦啦隊(我 miss 咗)，外國人的性格真熱情！Wellesley college scream tunnel 同靚女們 Hi-Five 完攪到我隻錶心跳變咗紅色衝咗上 180! 嚇鬼死我！如果有得 kiss 嘅話……
熱情的打氣人士
賽道：
整體上唔係話難，但 10 幾次上落，冇針對性練的話前面四頭肌後面 Hamstring 求其一邊抽筋在所難免，好彩有師兄介紹嘅抽筋水，尾 10K 隊哂兩包，先叫做冇失禮做步兵。三十多公里的 Heartbreak Hill 唔算話好難，但沮喪嘅係後面都仲有 2/3 上落，有少少想爆粗。
比賽的其中一段路段
補給：
好鬼多水站，多到有少少過份！最好係有 Maurten Gel 派，但最差係冇蕉，全程係 Gel + Gatorade 生化戰，都有好多熱情嘅觀眾俾真食物，礙於 Covid 我都唔太敢攞嚟食。
大會水站
大會安排：
整體 ok，可能我 Wave 2，等巴士唔太耐，個女司機有少少生死時速 feel，揸到架黃巴士好似 Tesla 咁，後 d 嘅師姐有話要等成 45 分鐘先上到車。最差可能係去到選手村蕉都冇得食，如果自己冇帶食物嘅話上線起跑就變得好肚空。完賽攞野安排順暢，袋禮物都幾多野，唔太寒酸。但我都係鐘意日本馬嘅毛巾多過 d 鬼佬嘅錫紙，唔暖，唔環保，之後冇用。
大會接駁巴士
完賽提取個人物品安排順暢
天氣：
真係感謝主。出發前睇係落雨，呢到近海又大風，落雨就凍到死！跑前一日仲有局部地方落過雪，攪到我心大心細唔知着咩好！點知比賽日有陽光，唔熱，乾爽，唔太大風，絕對係 99.9 分嘅天氣！但波馬出名天氣變化大，下年嚟就真係帶多 d 唔同裝備隨時應變。
比賽當天天氣很好
Summary:
波馬之出名除咗因為要波士頓馬拉松資格時間 (Boston Marathon Qualifying Times) 同歷史悠久外，我覺得係整體上 d 人令到個氣氛好正。賽前幾日通街都係人跑步，所有人都着住件波馬 jacket show-off 吓，又有好多跑會安排 shakeout run (即比賽前跑一個 10-15 分鐘的 jogging)，總之就係好濃嘅跑步氛圍，好正！加上 Boston 人真係好 proud of 波馬，好熱情，仲有嚟自美國各地嘅跑友家人朋友，真係好鬼 High! 波馬絕對係年年要到嘅跑步嘉年華！！！ 希望下年更多香港人一齊參加！我今次静係同倒一個香港人大叫：香港人加油！！！
文章由 Runner Pandapapa (熊貓爸爸) 投稿
圖片由投稿者提供