BLACKPINK優先搶飛大塞車　不停跳番去Cityline嬲到爆

韓國人氣女團BLACKPINK落實明年1月13日至15日於亞博舉行一連三場世界巡迴演唱會《BORN PINK》，不過日前很多Blink（Black Pink粉絲名稱）都未能在官方會員優先購票日成功搶飛，有黃牛黨更將原本2,299元的VIP門票炒高近5倍，以天價15,698元出售，到昨日優先發售，有門票更加被炒高14倍以開價近4萬元一張，認真猖狂。

今日輪到主辦單位Live Nation會員優先購票，不過網站於早上10點開賣就出現大塞車，畫面一直顯示「載入中」，期間更突然跳到Cityline網頁，只能顯示港星如楊千嬅、黎明、譚嘉儀等演唱會門票，未能搜尋到主角BLACKPINK的演唱會，到早上11點半，網頁顯示所有BLACKPINK優先訂購演唱會門票已經售罄，未能成功搶飛的網民要等明天（23日）早上10點在Cityline公開發售。

事後不少網民都嬲爆去到Live Nation的Facebook投訴未能成功搶飛，有人更表示：「完全入唔到 同埋系統好廢」、「點解㩒咗成個鐘入到去cityline頁面，冇blackpink俾我買，得譚嘉怡、楊千嬅、黎明俾我」、「都未入到就sold out」、「點解排隊條link會彈去cityline個普通網而唔係去blackpink賣票個網? 10點半時以為入到, 係cityline搵咗好耐都搵唔到blackpink, 迫住重新再試, 11點幾入到就話賣晒, 即係玩人啫」等。