若不是 Peter 相約拍攝，孤陋寡聞嘅我一直唔知有「奮進會」嘅存在，盼楊銳湘教練 (人稱湘教)、助教 Justin 及 admin 小花多多包涵，失敬失敬!
「奮進會」作風低調，創辦人湘教赤手空拳單人匹馬營運逾十年，保守估計至今有二三百位學員，拍攝當日不少老而彌堅嘅學員自創會加入至今，RESPECT!
更令人 RESPECT 嘅係，為人師表嘅湘教可能職業病關係，將嗰份有教無類嘅大愛精神一拼投放於跑會中，無分老幼貧富年齡出身，大門長開。草根基職低收入 ? 無所謂，唔收錢仲要送你裝備，大佬，幾乎貼埋大床，就係想你「跑吓啦」!
你我身邊總有唔少傻佬傻婆，每星期動輒跑百幾至幾百公里，無目的甚至無動機，純粹為跑。
「奮進會」嘅湘教同樣無目的無動機，都係傻嘅，純粹為教、不求回報。
「奮進會」某程度上幾似一個教會，循循善誘導人向善為求身心平和。湘教嘅寬宏豁達，助教 Justin 嘅無私傳承，同學間嘅無分彼此，即使更艱苦更難捱，你總會聽到耐心堅持不要輕言放棄嘅鼓勵說話，溫暖且充滿愛。能結識一班志同道合，相互扶持嘅伙伴有幾重要 ? 練過 intervals 嘅會明，當你咬緊牙關衝每一圈嘅時候，會發現每一分鐘都變得好漫長，孤身奮戰不單難以跑得遠，能否撐下去都成疑問。
自此，每當自己於跑步、工作甚至生活上感到迷茫失落，都會睇返呢集「咩跑會咁巴閉 – 奮進會」佢令我深信活著原來可以好純粹好簡單，人大了，太多得失計算，開心快樂卻越嚟越少…..
跑者經常開口埋口講初心，到底乜嘢係初心?
當下香港，商業掛帥， 急功近利，講求回報，「跑步」都可以淪為市場導向嘅商業活動。惟「奮進會」贈鞋施教，湘教及助教 Justin 還多次提到「教學相長」嘅理念，傳授武功嘅同時，自身亦從中有所領悟，學員與教練之間並唔係一種「高、低、上、下」嘅概念，而係互相學習與啟發嘅繆斯。呢種將師徒關係淡化，於賽道上攜手邁進嘅方針，隱約滲著儒家式嘅「敏而好學，不耻下問」之格調。文人跑手湘教，確實讓我眼界開了!
The post 尋找跑會的故事 #09 | 奮進會 appeared first on Fitz 運動平台.