容祖兒唱到飛甩咪嚇親　自嘲：成件事好Rock

容祖兒（Joey）在演藝學院舉行的《ANOTHER SIDE…… JOEY · MY SECRET · LIVE》演唱會已唱了20多場，Joey 病癒後愈唱愈勇，昨晚一場更加唱到「飛甩咪」，Joey形容「支咪Stage Diving」。

身穿藍色魚尾裙的Joey encore當時正邊走邊唱《On Call 36小時 II》主題曲《續集》，其間Joey低頭整理裙擺，抬頭再唱大家熟悉的「DaDiLa~DaDiLa~Da~」時，突然「跣手」整支咪飛到台下，Joey 嚇到尖叫成個彈起，拍拍心口。台下觀眾向她遞回米高峰，Joey即慰問「有冇整親你？」

Joey 在Instagram 貼出這搞笑場面時寫道：「唔好睇我喺台上咁醒目，其實一直以來我有個花名叫da la di la，做什麼都倫倫盡盡，斟水飲會倒瀉水，攞乜都會掉在地上，食飯嘅時候俾我阿媽話下巴係咪穿窿，啲朋友話跟住我尾一定會執到寶。」

Joey指當時嚇到心臟停止：「望住佢由高處拋物線跌落地下嗰一個瞬間，成個畫面同攞錯顏色購物袋一樣咁surreal，當時我嘅心臟足足停止跳動左2秒。好彩無扑穿第一行朋友個頭，佢仲好醒目仔咁即刻俾返我。成件事好rock⚡️⚡️，鬼叫大家咁high，High到我枝咪stage diving。」 她更笑指，在她身上「Nothing is impossible」

有粉絲留言笑稱她為「Cardi J」、「呢個表演相當精彩，坐A行真係刺激 想俾你掟返次」、「行走的CD，遇上了會飛的咪」