古巨基昨日（11日）宣佈舉行《I REALLY LOVE TO SING AROUND THE WORLD LIVE 2023》演唱會，並預告有新 MV 推出，今日（12）其「I Really Love To Sing」音樂企劃第七炮，跟近年憑city pop大熱的歌手蛋撻頭 Delta T 合唱《有少少愛》正式上架。
基仔表示這次除了跟 Delta T 合唱，亦特意邀請他對歌曲進行重新編曲，「我哋同舒老闆（監製舒文）講，覺得應該可以搵埋 Delta 一齊去做編曲，因為既然合作得，其實好想將合作單位嗰浸『除』擺落去，或者佢喺音樂上嘅能力都可以加添落去。所以就辛苦咗你啦，因為改咗幾次，哈哈。都係嗰句，我同舒老闆就……係啦，精益求精啲啦，我哋比較『磨』啲㗎真係。」坐在基仔旁邊的 Delta T 深表認同，「我不嬲都係好老實㗎，但我深深知道一樣嘢就係有時咁樣先係得到好作品。」
基仔透露想這次歌曲的版本，跟原來的版本來一個大反差，《有少少愛》正正是有這種潛能，「試過做過一、兩個版本，但有時試咗 A，真係幾好喎，會唔會……有 B 㗎？哎吔！A 同 B 好難揀喎，會唔會有個 C 㗎？哈哈！所以要多謝 Delta T，除咗合唱上，喺編曲上幫咗好多。呢度又再要唔好意思，原來唔只編幾次，係仲要改歌再編。」Delta T 隨即謂：「我都好鍾意編曲，所以呢個過程係真係好玩。」基仔見狀，立即侃調他一番，「不如我哋今日拍完 MV 返去再改多次，哈哈。」
MV 方面，基仔找來美術指導兼造型師兼歌手等多重身份的劉君冬（Dorothy）擔任導演。Dorothy 指一收到基仔邀請，以為只是寫歌或造型的工作，但隨後得知是一個大 project，即超級緊張，「嘩！好大嘅 project，係一個三部曲，再聽到隻歌之後，原來係三隻唔同曲風嘅歌，同埋係三位好唔同嘅 artists，一聽到係幾 challenging，但係係好玩嘅 project。」
在整個的創作過程，故事概念及結構，基仔對 Dorothy 讚口不絕，「好勁呀你度咗呢個故仔，度咗我係包租公，然後喺間屋睇住唔同嘅人事變遷、愛情，好多感受嘅嘢。喺同我講個故仔流程嘅時候，佢有講吓自己嘅經歷，係有好多嘢喺入心嘅一個人。我覺得做創作或者做導演係好，將內心柔軟㗎一面喺作品上展露出嚟。」
Dorothy 表示：「除咗利用空間 connect 三個故事，其實呢啲情歌都盛載住唔同嘅故事，可能嗰隻歌係某啲人定情歌、分手歌，古 sir 就係『業主』身份，你嘅歌係見証咗好多唔同嘅聚散，所以就擺咗你入呢個角色。我都有擺啲個人經歷入去，希望大家有被感動到。」在搜集道具時，Dorothy 亦十分有心思，她持意將大量基仔的 poster、專輯、yes card 放在 MV 中，「閃嘅 yes card 都有，應該可以拎去炒。」基仔聞言即謂：「yes card 都有呀？！嗰啲叫幻彩金，原來後期同 MV 有咁多嘢，好期待。」
