Ray Online｜謝偉俊被批評格格不入或「冇得撈」　反問「格格都入」對社會有何好處

立法會議員謝偉俊周不時喺議會被視為「反對派」，近排有報章引述唔開名嘅資深議員話，謝偉俊呢類太有個性嘅議員喺議會格格不入。謝偉俊回應話「最近有所謂資深議員批評我喺呢屆議會格格不入，甚至可能冇得撈」，就話得啖笑，反問「格格都入」對社會有咩好處喎。

今日立法會大會繼續審議《財政預算案》，謝偉俊發言嗰陣突然回應事件，話如果「格格都入」，所有人都係同一把聲音，恐怕幫唔到政府。謝偉俊仲話會令社會覺得冇價值聽議員講嘢，覺得議會同佢哋冇關係、幫唔到手，令佢哋莫不關心，甚至躺平。本身係律師嘅謝偉俊用法律界做例子，話大家目的都係爭取公義，但作為原告、被告、檢控官，大家都有唔同角色，會喺唔同角色之上爭取公義，就好似喺議會大家都希望爭取社會上最大公益。

謝偉俊話審批議案唔容易

講返今次《財政預算案》，謝偉俊話審批議案唔容易，因為透明度唔夠，當議員就財政預算案向政府問問題，政府一句「商業秘密」就唔問得，例如議員關注特首政策組用公帑外判研究啲咩、林鄭月娥喺太古廣場嘅前特首辦公室使費係咪用得其所等等，政府都答唔到。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)