一直以嚟唔少跑友誤以為我哋只拍攝大跑會或出名跑會，其實我哋更鍾情刻意低調嘅中小型跑會，越係低調就越想摷佢哋出嚟。正如今次登場嘅「Weak Ends Here」，佢地嘅IG簡介只有「逢二跑班」 四隻字，無詳細介紹亦無訓練細節，但卻實實在在地營運咗12年，低調型，非介紹不可 !
跑會以外，「Weak Ends Here」亦係網上運動與潮流資訊平台。主理人 Maverick (同學們都叫佢M教) 本身係一位銀行從業員，為著對運動嘅熱愛而毅然投身拳擊、體能、跑步等教練及運動記者行列。後來定期相約友人一同跑步並分享跑步知識，參加者有其小學同學、舊同事及朋友，彼此於輕鬆愉快嘅氛圍中一同練習。友儕間嘅團跑當然無需鳴鼓不用高調，故一直安於自己友跑團性質。後因拓展資訊平台業務，再低調也要開門見人，「Weak Ends Here」漸浮面，自己友跑團順勢發展成常規跑班，然而本性難移，M教還是鍾情小班教學，與其前呼後擁不如溫馨融洽，宣傳與推廣依然一貫的節制。
誠然，大跑會當然有其優勢，支援與資源較多。但對於有社恐或毒L如我呢類人，置身於一大棚還未熟落嘅跑友間一齊跑步、吹水，即使一齊食飯，其壓力可能比衝 interval 還大。反而去到關係較密切嘅中小型跑會，需應對嘅人較少，即使第一堂都唔會有你眼望我眼嘅老尷，不用強裝埋堆扮融洽，人也變得輕鬆自在。簡單一個真摯笑容點點頭，盡在不言中卻有心照不宣之效，小班教學但格外多添一份真誠與自在， 有 feel !
發覺無論幾艱難嘅時候，身邊都總有一堆傻佬單憑心中一團火而向理念邁步直往，M教絕對係當中表表者。「Weak Ends Here」不覺間已營運咗12年，看遍高低起跌，但仍以「運動」於此地謀生，肯定膽大卻絕不妄為，直認只懂默默耕耘而不知何時收成嘅 M 教，談起經營之道，只從容一句「成年人嘅世界都無咩係容易」道盡了現實嘅無奈，但卻展現其豁達，與其日復日愁眉苦面埋首於枯燥刻板，何不笑容滿面盡情放手一搏 ?! M 教呢種人生哲學竟無意間滲進其跑班中，學員間隱隱帶著一種開懷舒暢，昂首闊步嘅大無畏。
跑步好人生路途上也好，我們都需要 M 教呢種傻佬從旁啟示 – 你永遠預測不到何時收成，但除了努力不懈地耕種，你還是別無他選。縱使12年的高低起跌過後仍屹立於此，那下一個12年呢 ? 除了抱著「上善若水」之心就只有神知道了。
The post 尋找跑會的故事 #31 | Weak Ends Here 弱點於這裡終止 appeared first on Fitz 運動平台.