相隔18年再主演電視劇，鄭中基新作《暖男爸爸》一出即成全城熱話。收起搞笑本色，搖身一變成為一個充滿故事同歷練嘅單親爸爸，鄭中基除了演技到家，背後亦的確係個年少輕狂過、跌過碰過最後洗心革面，一切以頭家至上嘅暖男爸爸。一個家到底可以改變一個人幾多？睇吓圈中呢幾個最佳暖男爸爸就知道。
撰文、圖片：東方新地
鄭中基曾被FBI拘捕
96年出道時，鄭中基因為有個唱片公司高層爸爸照住，一出道就有得同歌神張學友合唱一炮而紅。不過二千年因在飛機醉酒鬧事搞到被逼降美國再被FBI拘捕，事業即時走下坡。其後鄭中基重新振作演喜劇拍電影，至11年結婚生女後更修心養性，現在眼中只有家庭和一對兒女。
陳山聰搭上賭王千金荒廢事業
11年搭上賭王千金何超雲後就放下工作、背棄朋友、全副心機陪千金遊山玩水，曾幾何時陳山聰都試過荒廢事業仲搞到冇晒朋友。經歷過人生與事業低潮嘅陳山聰，如今已變成一個晒仔成狂嘅暖男爸爸。上月尾抱著四個月大囝囝Jaco慶祝囝囝第一個萬聖節，兼且亦係自己第一個結婚紀念日。
陳浩民太太臨盆之際 借醉鹹豬嘴後輩
太太蔣麗莎五年抱四固然了不起，陳浩民一個養起一家六口四個仔女，何嘗又唔係責任重大勇氣可嘉！其實就喺太太懷胎八個月臨盆之際，陳浩民因被拍到喺內地聯同另一人夫馬德鐘，借醉鹹豬嘴後輩陳嘉桓後，形象幾乎一鋪清袋，最後幸得太太原諒，畀機會佢做番個好爸爸。
蘇永康於台北被扣查判入看守所勒戒
50歲時老來得子，蘇永康嘅一切生活即時以仔為先，去到邊都一家三口齊齊整整。其實蘇康後生時都蒲過玩過，02更於台北因服食及藏有搖頭丸被扣查，最後被判入看守所勒戒。
陳豪一星期蒲足五晚
當年係電視城絕頂筍盤，家陣係育有兩子一女顧家錫老婆嘅超級暖男，唔係陳豪自爆都冇人知，原來初入行做model拍《晚九朝五》嘅年代，一個星期蒲足五晚，不過唔蒲過就唔會知自己其實唔鍾意呢種生活。
杜德偉跑馬地夜店內被搜出持有大麻
那些年的杜德偉曾紅透中港台，又有個名模女友周汶錡，生活多姿多彩又愛玩。03年喺跑馬地夜店內被搜出持有大麻，最後被裁定藏毒罪名成立，罰款四千兼留案底。如今杜爸爸有個嫩妻又有個寶貝仔AJ，已經變成一個住家男。
陳小春非禮未成年少女
67年喺內地惠州出生、12歲移居香港，陳小春14歲時因為非禮未成年少女被判罪名成立，其後入行從舞蹈員到歌手到演員，一樣愛蒲爛玩性格火爆。直至遇上應采兒，才修心養性甘被馴服，2017年帶埋囝囝 Jasper 參與內地親子節目演出，好爸爸形象深入民心。
郭政鴻一腳踏兩船渣男代表
結束完一段三年婚姻，郭政鴻便一直與滕麗名鬧緋聞，10年二人幾乎被認定為公開一對時，男方突然被爆有個同居女友，當時女兒都已經九個月大。一度淪為一腳踏兩船渣男代表，郭政鴻近年有女萬事足，接送返學、買餸煮飯、陪玩樣樣做齊。
李璨琛因醉駕被捕
中二輟學、做過果欄同電工，性格反叛嘅李璨琛外形草根，所以被導演陳果發掘主演《 香港製造 》。當年滿身紋身嘅不羈浪子，喺老婆生產前一個月因為醉駕被捕，不過女兒出世後即360度大轉變，成為女兒奴日日攬住囡囡李元元就心滿意足。
魏駿傑搭上重慶大學生
當年同滕麗名相戀九年突然分手，翌年就同20歲重慶大學生張利華結婚，魏駿傑曾經都係公認渣男。不過女兒Jessica出世後就全副心機放晒喺頭家同女兒身上，老婆被指整容面目全非又結交老外男友，最終離婚收場，好彩Jessica仲有爸爸不離不棄。
張致恒一腳踏幾船
先生仔再結婚、擺完百日宴至對外公布婚訊及已為人父，你以為張致恒(Steven) 搞錯次序？原來正印女友都係嗰刻至知被分手才真正眼火爆！雖然緋聞多多、形象負面更被舊公司解約，不過老婆雯雯再生多個又出po力撐Steven，讚佢顧家勤力係個好爸爸。