在周星馳電影《少林足球》中，飾演「輕功水上飄」六師弟的林子聰 （肥仔聰），與太太Christy結婚7年，2015年太太誕下囝囝林奕滔（滔滔），而今年1月再誕下囡囡Charmaine，湊個「好」字。不經不覺，Charmaine已出世100日，林子聰就為這位「前世情人」大搞百日宴！不過，原來Charmaine的誕生一點都不易，因為太太Christy在懷孕及生產過程都十分驚險，更要割子宮保命才可成功誕下細女，所以話母愛真偉大！
撰文：Kammy｜圖片來源：林子聰Facebook，梁云菲Instagram
林子聰為細女大搞百日宴
現年42歲的林子聰今年再度榮升人父，早前適逢細女Charmaine出世100日，林子聰就為囡囡大搞百日宴，更邀請藝人金剛同其女朋友梁云菲一同出席。從相中見到，Charmaine身穿一身美人魚裝扮，當時她正在熟睡當中，十分可愛。
太太為誕女 要割子宮保命
林子聰的太太Christy懷有細女時，被發現有「植入性胎盤」，即在分娩時胎盤無法成功剝離，容易造成媽媽大量出血。Christy在懷孕6個月時，突然腹部劇痛，林子聰就即使召救護車送太太往醫院，太太亦在救護車上分娩，而剛出世的細女只有兩個手掌般大。當時林子聰曾表示，「其實我已經唔係好敢望，因為唔知望呢一下，可能已經係最後一面。」
不過，由於Christy在分娩後大量出血，需即時輸11包血，心臟更一度停頓1分鐘，兩母女分別被7位醫生搶救，而林子聰就在手術室外等了足足5小時。最終，太太要割子宮才可保命。
細女腦出血 需插喉保命
至於細女方面，Charmaine出世時僅得1.9磅，當時心臟跟肺部都未完全發展，要待在保暖箱內留醫，身上更插滿喉管。醫生表示，雖然用了多個儀器去協助囡囡呼吸，但關鍵都是要靠Charmaine自己。直到囡囡體重回升至4磅，太太才可再接觸她。不過，由於細女在住院期間曾試過腦出血，當時更一度因腹脹而未能飲奶，差點要開刀將營養液直接注入其腸道，林子聰表示，當時他不斷握緊囡囡的小手，叫她「乖乖哋食嘢啦」，Charmaine的情況亦慢慢變好，免卻了開刀。最終，囡囡住院3個月後終於可出院回家。
林子聰：得來不易！
林子聰因差點痛失妻女，一度患上心理創傷症。幸好，現時Charmaine已經肥肥白白，與一般小朋友無異，令林子聰放下心頭大石，病情亦逐漸康復。有這次經歷後，他一有空就會抽時間陪家人，因為他深感明白「一切都得來不易」，一家人整整齊齊是最緊要。
餅印父子林子聰 : 想個仔靚啲
林子聰40歲時已榮升導演級，當時他笑言不太希望囝囝似足他，「似個靚仔啲好啲！第二樣似我就冇所謂， 個樣就一般啦， 我想佢靚仔啲。」他慶幸囝囝性格開心、聽話、好好湊，為他帶來無限歡樂，「以前覺得努力工作唔知為咩，可能只為財富、為名利，做咗爸爸後覺得一切都係多餘，原來努力工作， 歸根究底就係為屋企囉。」
星爺讚餅印 與陳真做「瘦虎肥龍」
獲周星馳賞識帶入行的子聰，至今與星爺保持友好關係，滔滔出世後亦見過一次，在飯局中星爺都笑滔滔：「同你餅印咁呀！」
《少林足球》一眾師兄弟中，六師弟與四師兄陳國坤（小龍）感情最要好，大家年紀相若，齊齊在影壇起步，現在連生仔都差不多時辰。九個月大的滔滔，size比半歲的陳真大一個碼，樣貌就陳真睇落成熟啲，子聰賜予兩B綽號「瘦虎肥龍」，「佢個仔細我個仔三個月，但size細好多。」他解釋滔滔因為頭大先睇落大隻，「佢出世前因為個頭太大，所以醫生話唔可以等到足月，要提早開刀生。我初初都唔覺佢真係咁大隻，但一併埋其他BB度，嘩！佢真係大好多喎！」
餅印仔逐張睇
滔滔不只樣貌似爸爸，性格都似足他，比較硬頸自我，不想默守成規，反應直接，絕不扭擰，子聰說︰「佢要食就食，慢啲都唔得，唔鍾意就撥開，好似佢唔鍾意飲水，俾啖水佢都會撥開，點迫佢都唔飲，有需要先飲。」
星爸圍埋講細路
子聰與小龍多年來中港兩邊走，主力拍電影與內地電視劇，與同樣北上發展的星級港爸陳浩民、洪天明同聲同氣，現走在一起只有一個話題——爸爸湊仔經。子聰笑說：「我哋冇晒其他話題㗎喇，全部都係講細路，媽媽坐埋一齊講細路，爸爸都係咁。點呀？你個仔有冇呢啲病痛？攞咗passport未？學校點揀呀？你想帶佢去呢度玩呀？唔好去呢度呀！好熱好多蚊㗎，啲細路好怕俾蚊咬！我哋講好多呢啲囉。」
陳浩民生了四個小孩，最有經驗，子聰形容他為「生仔老手」，「佢差唔多每年都生一個，好多階段佢都經歷晒，大女下年就上小學，佢已經諗緊揀邊間。所以佢每逢遇到問題，就會第一時間同我講，保險要買啲乜嘢，學校一定要諗定，如果有兄弟姊妹都要考慮埋，最好可以一齊升，讀到一條龍學校就最好，可以一路直升！」有浩民實踐完講番「賽後報告」，子聰煩少好多，「佢一路講我聽，好多嘢我都唔使煩，好似佢個女讀St. Catherine’s，出到嚟都好醒目，語文又好，係升小學比較煩，要由頭再考過擔心多一次。」子聰笑浩民見自己多過見老婆，都爭取到時間生四個，「真係掂吓都有，佢可以做家計會代言人。」
生仔準備充足
子聰由2007年至2015年，一直在內地打滾，2012年與太太婚後第二日，已返回橫店工作，直言仍欠太太一個honeymoon，「婚後兩三年都冇時間造人，2014年仲要拍《美人魚》，我係執行導演。」
子聰外表funny，但性格杞人憂天，生仔須經過深思熟慮，即使林爸爸一直催促，他亦要確保自己ready才決定做爸爸。「以前好多朋友叫我快啲生番個，好好玩㗎，我心諗有幾好玩呀？細路仔啫。依家先發覺，原來真係好好玩，真係好happy！」當時已經40歲的他不覺得自己遲生，因為現在的他是準備充足，是最佳timing。「做父親都要ready，尤其是心智，因為小朋友望住你長大，你點樣佢就點樣，如果你未ready做一個好父親，待人處事都未做好的話，對小朋友都未必係好事。」
囝囝鍾意笑 為爸爸減壓
未做爸爸前，子聰覺得工作辛苦過後，沒有渠道紓緩壓力；有小朋友之後，返到屋企壓力一掃而空。為了兒子他更改變自己生活，變得健康有規律。「我早咗瞓、睇少咗電視，用更多時間同佢玩。依家做完嘢會即刻返屋企，好少應酬，出街都帶埋佢一齊去。我想做好身教俾個仔見到，我係重視佢，重視屋企，佢跟住學就好喇。」屋企不單止一家三口，還包括整個家族，「帶佢同我爸爸食飯，周圍去探親朋戚友，多咗好多家庭樂。」
開始牙牙學語的滔滔，絕對是林家的開心果，鍾意笑騎騎，「我6、7點收工返到去，佢就一路玩一路笑到瞓覺。佢依家認緊人，佢認得你、望到你就好開心，有次我拍戲離開十幾日，我都驚佢唔認得我，好彩佢瞓醒認得我，一笑我就冧晒。」
回看《長江7號》 父子情不足
充滿父愛的子聰現在參與的電影，多加了父子情，多從父親和小朋友角度出發，希望能啟發滔滔及其他家長小朋友。他又言現在回看電影《長江七號》，覺得星爺的父子情亦不足，「講真佢兩個似couple多過父子，當時我哋都冇經驗，依家睇番覺得唔夠touching，加番乜嘢會好啲，演繹上點樣會好啲。」
為了滔滔，子聰會減少北上，盡量留港拍戲陪兒子成長。至於教育方面， 子聰不希望隨波逐流， 由家長自己取回選擇權。「呢個社會嘅價值觀係扭曲咗，但社會係咁，你唔一定要咁，賣麵包一樣可以搵到食，學校都冇教整麵包，何況要整得好食。如果佢將來去賣麵包，咁十幾年嘅教育真係無用㗎喎，所以條路係點、社會係點，你未必要跟住行。」
教好小朋友非學校責任
這個想法，子聰將來一定會灌輸滔滔，不會催谷其學業，在整個學業生涯最重要得到快樂，摸索到方向，將來行出一條屬於自己的路。「我唔係好care學業，甚至係多餘，我覺得人嘅路唔應該由學校幫佢定，學校係當小朋友未有工作能力前嘅一個過程。教好小朋友唔係學校責任，係屋企責任，學校嘅責任只係好少，所以我唔係好睇重學校嘅嘢，只要學校俾到個開心過程已經足夠。」
子女在長大成材的過程，最重要由父母從旁輔導，如果滔滔有志做星二代，子聰不會盲目支持，要讓他知道娛樂圈背後辛酸的一面。「呢一行唔好嘅一面，佢可以喺我身上睇到，例如大熱天時着古裝、黐頭套好辛苦，隨時會中暑，仲要喺惡劣環境之下表演，你係咪會做到？但咁辛苦都未必會成功，呢個世界一分耕耘唔等於一分收穫，但你唔耕耘就一定冇收穫，之後點選擇你自己再衡量，想試我就俾你試，你都係鍾意嘅，冇嘢再難到你㗎喇，包括你老竇。」