資本社會，金錢至上
香港人最關心係咩？三個字，錢！香港政府喺2018年3月23日公布2018-19年度《財政預算案》「關愛共享計劃」。嗱，係咪聽唔明呢？簡單嚟講，即係政府想同市民共享經濟成果，還富於民，派四千蚊畀各位。咁正常大家都歡天喜地，邊個會同錢鬥氣先？又點估到，由政府公告到而家開始派緊錢，呢件事一直受到各界批評！由申請資格、申請表格、點樣派錢到程序處理等等，都係劣評噃。到底呢件本應係天大喜事嘅德政，點樣行差踏錯，去到備受香港人負評嘅地步？今日DailyView就同大家一齊回憶返，網路上市民討論四千蚊嘅五大批評，加埋話你知澳門係點還富於民喇！
DV小教室：香港網路大數據觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
四千蚊派得太少
——計埋我退稅都有四蚊嘅
根據經濟學嘅原理，人嘅慾望呢，就係無窮無盡嘅！四千蚊，喺今時今日物價通脹嘅香港地，其實真係唔算一筆大數目。Well，better than nothing嘅。咁點解會俾咁多人批評？皆因有對比囉！早喺2011年，七年前政府已經派咗六千蚊，足足多成兩千蚊，哇，係四千蚊嘅一半噃！有網民分享佢退稅之後得返四蚊俾，笑大人把口咩！
image source:IG me_tea_bee
四千蚊申請資格繁複
——到底返Parttime又得唔得
四千蚊派錢計劃一公告出嚟，網上即刻興起熱烈嘅討論。佢哋並唔係話緊四千蚊可以用嚟買咩，多謝政府咁。佢哋全部都喺到問緊：到底點先符合資格申請到呢四千蚊呢？出外留學、返工，叫唔叫定期居留？有物業嘅話，自住同非自住，又有咩唔同？返工返到咩程度先申請得？退稅又點計？老人家真係睇極都睇唔明，難怪大家狂插嘅。
image source:IG wordsquarehk
填表寄信處理四千蚊表格
——說好的，「數碼港」呢？
香港政府一向號稱自己係先進城市，要變成以科技為主嘅數碼港，IT菁英即刻進場！但難堪嘅係，喺二十一世紀2018年嘅香港，公佈四千蚊計劃竟然決定回到八十年代，叫大家填表寄信，等政府員工再慢慢一封一封咁打開，再一粒一粒字咁打入電腦……政府話，整個程式要十幾個月喎。而家俾網民瘋狂恥笑，話香港係科技沙漠，真係So sad！
image source:southernethouse
唔夠人力處理隨時無咗四千蚊
——東家唔打咪打西家囉
黃子華曰：唔係話做唔到，但係呢，喺呢個人工就無計喇！香港人就係咁，老細出幾多人工，咪畀返幾多分力出嚟囉。返工唔講錢，唔通講心咩？政府好明顯高估咗香港員工嘅忠心，突然有十幾萬份表格要人手處理，入表又要發放SMS，仲加埋查詢電話。喂大佬你人工俾得咁低，工作量又Over哂，唔怪得爆發離職潮，甚至何啟明議員話有市民嘅表格唔見咗！
image source:IG 9uphkcom
派四千蚊但要用三億行政費
——型過發哥燒銀紙喎
香港政府最多嘅係咩？無錯，就係錢喇！小小一個彈丸之地，但係世界知名嘅金融經濟都市。近呢幾年搞嘅政策、工程，所用嘅金額，都被網民稱為「天文數字」，夠起條鐵路通向月球。今次政府話派四千蚊，《香港01》評估之後，話入面消耗嘅行政費至少要三億。唔怪得連建制派曾鈺成都寫文插政府派錢邏輯混亂。有網民話，燒錢，其實咪又係香港人嘅錢……
image source:IG ideate.trails
派錢三大比較：香港 VS 澳門
3 澳門申請資格人人有份
——一目了然唔使煩
香港申請資格搞到咁鬼煩，已經有好多議員砲轟成件事令人無所措從，大家睇完解釋都仲係理解唔到自己符唔符合資格。咁仲有一個原因嘅，就係有對比囉！唔講香港上次派六千香港人個個有份，用澳門呢個咁近嘅行政特區嚟比一比，人哋只要係「持有有效或可續期的澳門居民身份證居民」就得。呢種咪叫方便，Everyone happy囉。
image source:IG iamyour.auntie
2 澳門年年都有錢分
——每年嘅IPHONE基金
香港咁多年，對上派六千已經係喺2011年，2018年決定派四千，到而家仲未派得完。喂大佬計通脤都蝕哂，碗湯凍哂都唔好飲喇！香港人見到澳門真係恨死隔離，年年都派，年年都加碼，完全追得上通脤。2008年派到2019年，斷估佢哋已經變咗傳統，下年，下下年，下下下年都會Keep住派。咁香港呢，都好難再派囉，唯有年年葡萄喇。
image source:FB 蘇嘉豪 Sulu Sou
1 澳門就一萬，我哋就四千
——多過香港人成倍有突
出街食飯俾貼士嘅話，你會唔會俾成堆神沙人哋先？出手太低，以為人哋好受落，隨時會有反效果嘅。澳門就醒喇，今次齊頭派一萬，咪話唔爽。香港人得四千蚊，去旅行唔知去到邊，買最新IPHONE又差成截。難怪政府派錢政策一出爐，有人話當香港人係咩？不過澳門人口少香港咁多，派多過香港，都唔需要咁傷心嘅，我哋總數加埋仲多喇……
image source:FB 愛瞞日報
盈餘不同，港府兩次派錢也不同？
2011年，香港首次派六千蚊俾香港市民，當時香港嘅盈餘有713億港元。2018年，香港財政盈餘高達1300億港元，但只係派咗四千蚊比部份香港市民。數字唔會昆人嘅，咁點解兩者會成反比關係呢？我哋睇返歷史發展，其實兩次派錢都幾經波折，並唔係一開始就決定派錢。2011年曾俊華時任財政司司長，因為臨近選戰，經建制派建議先將原本注資強積金嘅六千蚊，轉為發畀香港市民。2018年陳茂波時任財政司司長，因為原本嘅政政預算案比市民狂插，多位政黨人士要求下，先決定發放四千蚊。簡單講，兩次都係突發決策，同盈餘有幾多，真係無咩關係可言。
分析說明：
本研究資料分析時間範圍為2018年05月23日至2019年05月22日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港派錢不滿及比較』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。