人不MK枉少年！
以前覺得七、八十年代好老好懷舊，轉眼間依家學生都已經係00後，一早已經過去嘅MK年代，成為90後集體回憶。除咗衣著之外，一班MK屆偶像又點可以唔提呢？
宜家個個打扮都跟足韓星，但想當年，台、日、韓明星都唔夠本地藝人嚟，唔少香港明星先係大家潮流嘅指標，回過頭覺得好MK，不過係當年不知幾潮！今日DailyView就帶大家嚟睇吓呢十位明星，當年係點樣帶領MV文化！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 Dear Jane（3979筆）
香港呢個地方玩音樂唔容易，但係近年都有幾隊Band嘅作品受到大家關注，其中一隊就係Dear Jane。2013年《不許你注定一人》唱到街知巷聞，網友把口話係MK情歌，聽落唔知讚定彈，不過點擊率同受歡迎程度已經說明一切。香港曾經出過Beyond呢隊神級樂隊，相信大家都好希望廣東話歌呢個市場入面，都繼續有樂隊創作更多好作品。MK？其實都係本土文化嘅一種姐。
image source:Facebook/Dear Jane
9 Shine（4076筆）
2012年《Concert YY 黃偉文作品展》Wyman搵嚟唔少好耐無出現喺大家面前嘅歌手再次重現經典作品，其中一隊引起好大迴響嘅就係Shine。憑住一首《燕尾蝶》，將大家帶返去回憶中嘅年代，呢首歌當年無得獎，不過事隔多年再次演出之後，因為大家反應熱烈，Shine喺之後兩年內開咗七場大型演唱會。唔知係咪因為當年歌迷都長大，終於聽得明歌詞意思，所以重溫起嚟特別有共鳴呢？
image source:kkbox
8 Twins（5445筆）
「同學愛新鮮 戀愛大過天～」講到香港組合，最成功嘅就不得不提Twins啦。當年一出道就爆紅成為最年輕、亦係第一組踏上紅館嘅女子組合，無論快歌定慢歌都一樣紅到周街都播。兩個人係少女嘅模仿對象，同時係少男夢中情人。呢幾年經歷過高山低谷咁多事，兩個人同以前一樣咁好感情，陪伴大家成長，幾年前再次企喺紅館開演唱會，全場觀眾都同佢地一樣好感觸，話Twins係呢一個年代嘅集體回憶絕對當之無愧呀。
image source:youtube/英皇娛樂
7 方力申（5639筆）
前香港游泳運動員方力申出道，憑住陽光形象同運動員身材，吸引唔少Fans，同鄧麗欣Stephy合作拍過好多套電影同有幾首經典合唱歌，螢幕前後都係好多人心中金童玉女，最後分手收場，同佢地一齊走過咁多年嘅Fans都覺得好可惜。MK過嘅都一定唔會忘記《獨家試愛》、《十分愛》等一系列由葉念琛執導嘅港產片同《好好戀愛》、《好心好報》，《七年》等等呢一連串佢地合唱嘅經典歌曲。
image source:youtube/Evan Gaming
6 陳柏宇（5763筆）
出道13年， 喺2017年再次彈起喺紅館連開兩場演唱會嘅陳柏宇，被人稱為只欠一個男歌手金獎嘅實力派歌手，佢嘅歌大家都唔陌生，不過咁多年都算係紅歌唔紅人。仲記得嗰陣時一個廣告配埋陳柏宇嗰首《永久保存》，靚聲唱冧歌，真係紅到成條街都唱緊同一首歌。後來《你瞞我瞞》，《車匙》都係大家耳熟能詳嘅歌，打開Facebook總有幾個情聖會用呢D歌詞抒發自己感情。
image source:sonymusic
5 麥浚龍（6079筆）
講起麥浚龍，大家印象中唔少得耿耿於懷同念念不忘呢兩首MK年代訴苦之歌，過咗咁多年大家都一樣琅琅上口。其次就係Juno近年非常獨特、做自己，走喺潮流尖端嘅造型。其實一開始Juno出道嗰時都係標準MK金毛造型加一身寬鬆潮牌，之後先慢慢一步一步喺音樂同造型都建立自己特立獨行嘅一面。
image source:Youtube/HKM
4 林峯（10889筆）
由《尋秦記》開始演藝生涯嘅林峯，喺TVB拍攝過唔少好受歡迎嘅作品，不過講到佢另一個事業高峰就應該係轉型做埋歌手之後。「如果可以恨你，全力痛恨你，連遇上亦要躲避～」2009年喺紅館開咗兩場演唱會，2012三連霸成為最受歡迎男歌星，歌曲《Chok》仲拎埋金曲金獎。個陣時講起Chok，真係無人夠林峯嚟。
image source:Youtube/wangzilover89
3 余文樂（12821筆）
依家講起香港嘅潮人，余文樂通常都會榜上有名，自創潮牌都係好多年輕人會入手證明自己時尚品味嘅服裝。當年出道余文樂其實都係鄰家男孩清純look，嗰陣興將頭髮剪到好碎，好有層次感嘅髮型，再戴返隻鑽石耳環，真係迷倒好多少女㗎。後來《志明與春嬌》，張志明呢個角色夠曬本土深入民心，都一洗以前MK味，變得又型又Man。
image source:wiki
2 陳偉霆（17759筆）
參加全球華人新秀歌唱大賽香港區選拔賽之後進入演藝圈，前Sun Boy'z成員陳偉霆，Sun Boy'z 嘅歌你可能未必記得，不過單飛之後以香港少有嘅唱跳歌手身分繼續發展，當年一首Taxi真係唱到全香港都知，個個都識唱。回顧陳偉霆以前衣著打扮，真係充滿MK味，不過後來北上發展，大受歡迎，搖身一變成為內地一線小天王，唔少綜藝節目都可以見到佢，身價大升之餘，時尚品味都一樣上埋位，仲有唔少名牌搵佢合作。
image source:wiki
1 容祖兒（44395筆）
喺以前仲有MSN嘅年代，各位少男少女個人狀態幾乎都會用各式各樣慘情歌歌詞，加上一堆唔同符號點綴，嚟去表達自己嘅内心世界。容祖兒嘅歌咁多年都一直係大家唱K必點金曲。經典歌詞當然都係唔少人心頭好：「喜歡你讓我下沉~喜歡你讓我哭~」無論你失戀定單戀，相信祖兒嘅歌都陪伴過你走過個段青春歲月。啱啱過去嘅八月開完出道二十週年紀念演唱會，唱足19場，果然係越唱越強嘅樂壇天后！
image source:fandom.com
分析說明：
本研究資料由《KEYPO大數據關鍵引擎》提供，分析時間範圍為2019年04月11日至2019年10月07日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『那些年的MK偶像』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
idqetuo Edison，謝霆鋒，鄭伊健都無，你呢個排名一d都唔準
2019年10月09日06:25
Davy🎮 鄭ekin應該係始祖 無佢套古惑仔系列 根本唔會有mk文化
2019年10月09日08:03
ICE🍄 Taxi 係乜黎 唔好話識唱 聽都冇聽過 唔好亂嗑當秘笈
2019年10月09日07:35
Nel 講mk，當年一定係謝霆鋒，超多人跟佢髮型，衣著。
2019年10月09日07:08
Daniel Lee twins同Joey啊哈哈哈哈哈哈哈
2019年10月09日06:38
顯示全部