陳展鵬日前宣布將與女友單文柔（Phoebe）結婚，拍拖年半修成正果，粉絲網友都紛紛送上祝福！日前單文柔就大爆原來陳展鵬曾兩次求婚，更要當眾下跪單文柔才答應，加上婚照都是為滿足她的要求，特別飛到英國拍攝，看來陳展鵬為抱得美人歸，絕對下過一番心思喎！
陳展鵬日前發聲明宣布與單文柔的喜訊，41歲的他將於今年10月迎娶28歲的女友單文柔，踏入人生新階段，「一路以來，我都全情投入工作，直至Phoebe的出現，讓我們感受到幸福與信任。對於感情比較傳統的我，是時候用最大努力去建立一個美滿的家，希望得到你們的祝福。」
單文柔接受訪問時，大爆原來男友先後求過兩次婚，不過第一次只有線摺的戒指，她因而拒絕：「佢趁我瞓覺，用一隻自己摺嘅心形紙戒指戴喺我隻手度，我醒咗就問佢：『咁叫求婚喇？』始終我想要一個畫面，所以話唔答應，但其實好開心！」
之後兩人到英國拍婚紗照時，陳展鵬決定再向女友求婚一次，於英國當街跪地求婚，單文柔坦言非常感動：「我一直好期待呢個畫面，好感動！」
陳展鵬特別於寫有「520 Marry Me」的巴士前下跪求婚，令畫面更好看，「呢樣嘢係我欠咗Phoebe！要做埋呢Part佢先應承，所以嗰日就影咗呢張相。」
除了為滿足女友的願望兩次求婚，陳展鵬更為對方特別飛到英國拍婚紗照，「因為Phoebe好鍾意嘅地方，同埋佢喺嗰度讀書，所以喺英國做呢個畫面出嚟，係希望佢留住呢刻回憶啦。」
秘密到英國拍婚紗照，陳展鵬坦言心情緊張又刺激，於拍攝時更擔心會被偷拍放上網，令婚訊曝光。
陳展鵬指自己為結婚籌備了一段時間，計劃於今年10月在香港行禮，「始終屋企人唔方便搭飛機，所以會喺香港結婚，原本諗住11月，但因為工作安排，所以定喺下個月中。」
據指婚禮將會低調進行，陳展鵬指計劃簡簡單單兩邊家人吃飯，不會大排筵席。
至於曾經與陳展鵬傳出緋聞的胡定欣，本來與男方是公認的一對，「舊愛」結婚了，胡定欣當然會被問到回應。她坦言對陳展鵬的婚訊不知情，至於會否出席對方的婚宴，她則表示：「其實人哋會唔會搞婚禮呀，你知唔知呀，到時先算啦，人哋都唔知點樣搞點樣邀請，咁都係開心事嚟嘅。」
其實自劇集《城寨英雄》後，胡定欣與陳展鵬就被塑造成熒幕情侶，兩人曖昧的對話和互動，更被認為是圈中公認的一對。但前年陳展鵬與單文柔山頂偷會被影到後，令戀情曝光，《城寨英雄》情侶檔正式告一段落。
當時更有不少粉絲指摘單文柔搶人男友，甚至有網友於單文柔的Ig鬧爆她，搞到陳展鵬要親自現身護花。隨着兩人愈愛愈高調，他們的戀情愈來愈叫粉絲受落，甚至有人稱呼她為「展鵬嫂」。
陳展鵬透露，他們暫時仍未正式定下日子，亦未入紙申請結婚，各位唯有靜心等待兩人的好消息啦！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**