2016年香港小姐冠軍馮盈盈近日嘅「公廁論」引起唔少熱議，唔少前輩都批評馮盈盈嘅言論過火，當中2010年港姐季軍莊思明直指「感覺好Cheap」！莊思明家姐莊思敏、男友楊明亦有為莊思明出返啖氣，但就再引起唔少網民嘅討論，呢場口水戰唔知要到幾時先完結啦！
馮盈盈早前喺節目《後生仔傾下計》入面大呻，港姐嫁入豪門的情況：「如果我哋嫁俾有錢人，就會俾人話睇心佢係想釣金龜，係雞係公廁！」而作為2010年港姐季軍嘅莊思明受訪時就直指馮盈盈用字太Cheap，仲叫佢唔好為咗出位而引用侮辱性字眼！呢番回應引嚟好多網民留言狂鬧莊思明！
莊思明亦不甘示弱，加入罵戰逐一反駁網民，表示：「我都係講自己感受啫，我都係人，我都有權表達意見，唔係我表達就有問題，其他人就無問題呀？佢（馮盈盈）嘅用詞唔係代表真誠，係粗鄙！如果粗鄙就係真誠咁我相信所有喜歡講粗口嘅人都非常真誠！」、「我係話字眼會畀人感覺cheap，我無話過佢cheap！」
作為莊思明男友嘅楊明亦有出面護花，自言睇到女友被攻擊感到心痛：「佢只係回應咗記者嘅問題，發表自己嘅感受都要俾你哋鬧，但係節目中亂講野嗰個就反而無問題，我真係唔明網民係咩心態！希望大家就算唔認同都唔需要人身攻擊！」
佢再出Post鬧爆鍵盤俠人身攻擊女朋友時，張寶兒同袁偉豪亦有留言力撐！
朱晨麗又留言話：「肥屍大隻都好難離地姐」，未知係暗寸馮盈盈肥屍大隻定係自嘲未夠馮盈盈貼地！
而同樣港姐出身嘅2012年港姐冠軍張名雅亦留言：「好男人道出心聲！」
而家姐莊思敏亦都出Post護妹：「一張嘴可以氹死人，同樣可以殺死人。我們要學懂慎言，學懂尊重。」仲Tag埋：alwaysonlisaside、別丟光環架、請尊重歷屆師姐、嫁得好應該是福氣吧
言論同樣大膽嘅麥明詩就力撐好友馮盈盈：「謂cheap也？見風使舵、見利忘義、損人利己、坐享其成。只憑言辭一兩句而妄下斷言，未免略為片面。」火藥味甚濃！
馮盈盈其實已經解釋「公廁論」係為女性發聲，只係轉述網民對港姐主觀又偏頗嘅言論，因為網民真係用呢啲字眼，「公廁論」並唔係佢嘅立場！明明馮盈盈係反對緊呢種言論，反而被人斷章取義，難怪一眾網民咁勞氣為馮盈盈辯解！
網民就係莊思敏個Post下面留言：「請你評論之前去睇一睇個一集節目 你口中嘅某人喺節目上面係想表達自己反對果種言論 唔好好似呢兩姊妹一樣 未睇過節目就去judge人」、「比網民話兩句就發哂癲 仲要搵男朋友同家姐幫手鬧fyy 老實講身為港姐喺ig同網民互鬧又有冇丟光環架呢？」
Text：Girls Editorial
Photo Source：Instagram