【安心出軌】節目仲播安仔歌 森美Like心穎道歉文遭狂轟

黃心穎繼許志安現身記者會認錯背妻出軌後，另一位當事人黃心穎翌日也在instagram發文道歉，但大部份網民都不接受二人道歉，曾跟黃心穎合作節目《學是學非》及《森美旅行團》的森美，因為Like了心穎道歉文，連日來遭網民圍攻。
網民到森美的社交平台留言：「點解你要like？對你好失望」、「有些錯是不應該原諒的，你身為人夫應該懂分對錯，將心比己，如果那是你太太這樣，你還認為該原諒?!why u like!!!!?」、「老實講 見到你個like有啲驚訝 然後係失望。喺一個公開既post度like基本上已經係一種表態。就算老友鬼鬼咪私下溝通表示支持安慰囉…何必攬屎上身呢？無人會因為你咁做而覺得你有義氣欣賞你 只會覺得你盲撐 根本無明辯是非」、「沒事吧？！ 咁快like嗰個人嘅post，只會令佢唔知自己嘅道德問題有幾嚴重！做咗令人傷心失望到想死嘅人仲咁多人支持？！咩世界」、「對你真係非常失望，唔係話好朋友就盲目去撐，如果真係friend你應該去鬧醒呢個破壞人地家庭嘅人而唔係讚同佢。」、「今日先同朋友講森美同黃小姐拍過旅遊節目，我哋都覺得你有大智慧，不會做錯事…現在我哋都收番句說話，因估唔到你like佢個post」等。
群情洶湧下，森美今早與小儀在商台節目還播安仔的歌《你的男人》，雖然播完歌後，兩位主持已解釋這歌是節錄上周五的男聽眾求愛時要求點播的歌，但仍被網民在節目的臉書留言：「 仲播佢隻歌？叫佢聽返自己啲歌詞啦，仲有資格唱？！」、「你知道唔知道 上星期個case好sweet 但為何彈咗許志安的歌？個mood 差咗」、「係咪要罷埋你個節目」、「好諷刺的一首歌」、「請禁播某人的歌」。