沒有一場愛情以結束為前題，但大部份愛情卻會突然告終。
婉婷跟耀達的甜密生活沒有幻想中長久，在大約同居大半年左右，他們便開始發現一個生活在香港最重要的問題——收入。
「你老闆又唔出糧畀你呀？」婉婷問耀達。
「係。權叔話呢期有幾單工程都未收到尾期。」 耀達對此滿有歉意。
「我仲可以透支多少少，頂住個租先。」
「但妳只係學生，點解個透支額可以咁多？」
「大學生嘛。」
即使被拖糧是意料之外，但當初確實是自己不自量力才會產生今日的困局。因此，耀達不敢直視婉婷，令他忽略了婉婷臉上的陰鬱。
身為大學生的婉婷本來就沒有收入可言，幸好當她發現耀達收入不穩時，已開始當兼職才有一點積蓄。可是，說到交租的話，她還是要依靠信用卡透支。原本以為只是一時三刻的過渡期，雖知耀達被拖糧足足三個月。
那幾個月，雖然只是兩萬多元的透支，但對從沒負債經驗的婉婷而言，內心的壓力絕對不輕。當同學邀請她一起消遣時，拒絕並不困難。可是，當她獨自漫步回家之際，總會一邊幻想同學們在歡天喜地，卻一邊計算着晚餐的成本。她強迫自己忍耐，說服自己是為愛情付出。
所以，在耀達跟婉婷說已經發薪的時候，她幾乎哭了出來。
「傻妹，唔駛喊呀？」
「你知唔知呀？我真係好驚呀！其實我張卡已經爆limit 喇！」
「咁呢個月唔駛再借啦！」
「呢個月？之前果啲呢？」
「權叔剩係出到呢個月糧俾我咋。」
「點可以咁㗎！」
「佢都有佢困難。我信得過權叔唔會呃我。」
「唔係呃唔呃，係法律問題呀！就算係打散工，按勞工法例，七日內都要出糧啦！而家咁樣，你係可以告佢，拎返你應得嘅。」
「出嚟做嘢，唔可以咁㗎。」
「你都識講啦！你出嚟做嘢係打工，打工就係為咗份糧。」
「權叔平日咁睇我，唔通要我迫到佢執咗間公司呀？」
「如果連糧都出唔到，間公司唔執都冇用啦！」婉婷不服氣，再補了一句：「我係怕你畀人搵笨呀！」
「係！我無妳咁叻，我咩都唔識，仲要畀人搵笨添！一個咁睇我，又肯教我嘢嘅老闆出唔到糧，妳就要我迫到佢執笠。咁一個連屋租都交唔起嘅男朋友，妳係唔係要分手呀！」
「你講咩呀？」
「我問妳，我咁冇用，妳係唔係要分手呀！」
空氣在狹窄的房間中凝結，默不作聲的兩人令氣壓增加，直叫婉婷喘不過氣。內心的不忿，加上首次聽到「分手」兩字帶來的悲傷，婉婷終於忍受不了，衝到廁所嘔吐起來。可是，賭氣的耀達卻沒有查看婉婷，等到他聽到沖廁聲後，才見到兩眼通紅的婉婷走出來。
「冇事嗎？」
「唔駛你理。」
「我唔理妳，邊個理妳？」
「你有理過我咩？你自己要有骨氣，唔肯同屋企人攞錢，好！我幫你頂。但係而家我爆晒limit，又邊個幫我頂呀？係唔係要我死死地氣返屋企同阿媽講？你有你嘅尊嚴，咁我呢？我走出嚟同你一齊住嘅時候，我同屋企人都反晒面㗎！」
如果耀達知道這一段說話是婉婷對這段愛情求證的渴望，而不是責罵的話，他大概會馬上擁着婉婷，安慰她。可是，不成熟的情侶在吵架時總有一道防護罩，深怕自己會成為罪人，總覺得自己是對的一方。於是，說話卻變得尖酸，也不懂表達真正的自己。
「我冇迫過你。」
「係。所以，係我蠢。唔關任何人事！」
那一晚，婉婷把自己關在廁所，不停地流淚。每一秒，她都在憤怒中期盼着耀達敲那道薄弱的廁所門。只要他好好地道歉，婉婷便會原諒他。可是，逐秒、逐分、逐小時地過去後，她仍然只聽到自己的抽泣聲。
第二天醒來，當她走出廁所門的時候，耀達已經像往日上班一樣離開了。而她也決定離開，只要跟往日上學不同，她不打算再回來。
婉婷回到家門，她已經忘了自己一直擁有「家」的鎖匙，也不敢按門鈴。當她不知所措之際，剛好遇上回家的母親。
母親見到婉婷的行李，沒有責怪，也沒有查問，只是淡淡地說：「今晚想食咩，我去煮。」
婉婷一撲進母親的懷中，以為哭乾了的淚水竟一再湧出來。
「媽，對唔住呀！」
「唔緊要。後生就係咁㗎啦！」
「對唔住呀！我知錯喇！我真係錯喇！」
「唔緊要，返嚟就得啦！阿媽永遠都喺度。」
「我……我唔知點算。媽，我……我有咗。」
那一晚，婉婷睡在媽媽身邊。
自小學畢業後，她首次再跟媽媽一起睡。至於一直嚴厲的父親，甫一回家見到婉婷，還未及開口便被母親喝停了說話，還可憐地整晚被趕了出廳。
「女呀，聽日我同妳去落咗佢。至於個男仔，妳就當佢同個BB一樣，從來冇出現過。知道嗎？」
「點解？如果佢搵返我呢？」
「男人唔知咩叫痛。佢傷過妳一次，到傷妳第二次嘅時候，就以為同之前一樣，會好番，會無事。女人呢？感情同身體一樣，只要穿咗，就永遠修補唔番條裂縫。妳就算呃到人，都呃唔到自己。」
六神無主的婉婷，重新變回聽話的孩子。
（待續）
重溫：
兩個天堂（1 - 4）
愛上不存在的妳（全十六集）
靈玲（全八集）
野.火（全十集）
前度暫存迷你倉（全兩集）
如果Double May有特異功能（全十五集）
柏原太賀facebook：
https://www.facebook.com/Kashiwabara30
Follow she.com on Facebook & Instagram