【CONY開箱】本地製造健康火鍋湯包　椰子燉雞清甜濃郁

天氣開始轉涼，即係打邊爐季節又到啦。現時大家對湯底嘅要求愈來愈高，因為深知即使食材有幾新鮮都好，放落一個唔好食嘅湯底就gg了！不過好彩市面上愈來愈多湯底選擇，好似CONY就試咗一款由香港製造，聲稱不含味精及防腐劑嘅湯底，聽落好健康，但到底味道如何？

「FIRE鍋」與主打即飲燉湯的健味之家合作推出的火鍋湯包系列，強調以天然食材製作出別具本土特色嘅火鍋湯底，包括胡椒豬肚、蕃茄豬骨、花椒麻辣及椰子燉雞四款湯底，只需要加1.5至2公升開水即可用嚟打邊爐。想先飲湯再打邊爐，則可以加7份開水，而且湯底仲可以用嚟烹調不同菜式，唔一定用嚟打邊爐。

近日CONY去朋友屋企打邊爐，帶埋新出兼期間限定嘅「椰子燉雞火鍋湯底」一齊試食（係呀，朋友出雞我出豉油（笑））。湯底以雞湯、椰子、椰子漿、紅蘿蔔、粟米、五指毛桃和紅棗熬煮而成。一開湯包就已經聞到好香椰子味，仲附有少量粟米、椰子和紅蘿蔔。加水稀釋後飲一啖湯頭，頗為清甜，亦有淡淡的椰子香。

朋友貼心地準備了多款肉類、海鮮和蔬菜，由於湯底較清甜，基本上跟所有食材味道都好夾，最重要嘅係唔點醬料都好夠味。CONY尤其喜歡湯底可以突顯蔬菜嘅甜味，亦唔會蓋過海鮮本身嘅鮮甜。朋友更加大讚湯底加咗幾次水都唔會太淡，唔似平時咁打到一半要再加湯包添味。總括而言，CONY同朋友對湯底評價不俗，有興趣試埋其他湯底。如果有讀者已經試過，不妨同CONY分享下！

銷售點：士多、HKTV mall和健味之家網店