Bossip｜中環再現「情債」苦主｜Louise

金融海嘯後，企喺中環攞住紙牌向途人訴苦者，不外乎迷債苦主。幾日前，類此情景再現中環，莫非預示金融危機快將殺到？細心檢視照片後，估計涉及債務，不過係「 情債」也。

這位中年女士着住一雙名牌Chanel鞋，手持印有「飛仔莊」即莊士中國（298）主席莊紹綏的海報，寫上「 無X」、「無Y」，似乎飛仔莊情債來自北方且有手尾噃。今年七十有一嘅飛仔莊，準確些應該係「飛佬莊」，出名風流倜儻，身邊女伴貨如輪轉。

以往股市當旺嘅時候，同班內房股老細friend過打Band，經常呼朋喚友如金利豐朱太、富力地產老細張力兩公婆出海暢遊，遠至帛琉、新加坡等地。當然不乏美女相伴，正所謂「叠水就自然叠女」，但企街舉紙牌此姝非近期身邊女伴，這筆可能是舊債。

情債呢家野，等於內房債市場。好景時，借平錢吸納內房債，印印腳收十厘八厘息，後來玩到Perpetual Bond（永續債），個名幾好聽㗎，無到期日，你以為永遠都有得續落去？等如啲靚女花樣年華，以為永遠都搵到佬，但係呢個世界有冇咁大隻蛤乸隨街跳呢？

現時提起內房債，連私人銀行客戶都喊得一句句啦，永續債原來係冇二手市場甩唔到手。即使好似飛仔莊騁馳金融界經年都領嘢，佢嘅莊士機構（367）及莊士中國投資內房債失利，包括恒大、富力、花樣年等等，早前業績公佈兩公司損手近廿億，所以「息字頭上一把刀」係無錯嘅。不過公司依然有息派，咁先對得住包括飛仔莊及個仔莊家彬嘅股東嘛。公司都要透過賣新加坡及香港嘅資產來救亡，所以近排飛仔莊都冇咁風騷，中環陸羽茶室及灣仔家全七福都鮮見其踪影。

睇嚟此女子舉牌都無用，有見飛仔莊兩家公司，部份債都要蝕住來掟貨，仲同你揸到尾一生一世咩？好多時諗住「財息兼收」最終係「賺息蝕價」。「情債」、「內房債」、「永續債」嘅投資理念都係一樣。

Louise

密切留意BossMind動向！立即CLS

FB Instagram Youtube