193郭嘉駿生日前夕外公離世　發長文悼念嘆要「愛得及時」

ERROR成員郭嘉駿（193）今日迎來35歲生日，卻在社交平台上載與外公外婆合照，傷心表示外公於昨日離世。他指外公以往每年都會送他生日利是，但今後都不會再收到，慨嘆寫道：「呢幾日係我腦海不停徘徊住呢四個字『愛得及時』」。

193小時候因父母工作關係，有很長一段時間由外公外婆家照顧，所以感情要好，「以前一直都覺得公公好犀利，到咗呢個年紀都仲可以身體咁健康冇病冇痛周圍走，個腦仲係轉得咁快可以睇財經炒股票。」

他又表示，新年最愛吃公公親手整的蘿蔔糕，但外公近年身體轉差，情況急轉直下，已很久沒吃過他親手煮的飯菜。193又分享自6年前入行後，外公一直追看他的節目、劇集，甚至報道，「我開始覺得終於可以令佢安心令佢自豪，就算遇到咩唔開心咩挫折，佢問起我都會話冇事所有嘢都好順利唔使擔心。直到真係賺到錢想請佢去旅行，先發覺佢身體條件已經唔許可。」

他續指自己因工作忙碌，忽略了外公，錯過陪伴他的時候，「搬咗屋想帶佢上嚟睇，買咗新車想帶佢兜風，開咗新餐廳想帶佢去食，一直覺得仲有大把時間唔使急住做，但原來所有嘢都要愛得及時，有時會責怪自己唔夠叻，如果我叻啲就可以喺頒獎台上面多謝佢，但原來時間係唔等人。」

他又後悔沒有親口多謝外公，「佢前兩日望住我話多謝我嚟探佢，但我見到佢咁辛苦真係好心痛，本身想話多謝佢一直以嚟咁錫我哋就真，不過因為唔想畀佢見到我喊所以轉身行開咗，到尋日再去醫院佢已經冇再郁過，我仲未來得及多謝佢佢就已經走咗。」

193的ViuTV同事及圈中友好，包括張繼聰、陳健安、岑珈其、少爺占及當奴等都留言慰問。而193的媽媽及妹妹「3妹」郭嘉盈都分別在社交平台出帖悼念，3妹寫道，「My Supper Grandpa」，而3媽就感謝爸爸的教導，寫道「You are my hero」。