黃金可以話係今年投資市場矚目嘅焦點之一，有唔少嘅分析都話嚟緊睇2,600美元一安士指日可待，究竟點解黃金有咁嘅叫座力呢？除咗黃金之外，仲有冇其他貴金屬都可能仲有爆發性嘅飆升呢？
貴金屬嘅需求可以分為三個部份，一個係工業生產嘅需要，另一個就係零售市場，最後就係國家中央銀行嘅儲備需要。首先講第三項國家銀行嘅黃金購買力，世界黃金協會喺2018年開始就有統計全球各國中央銀行購買黃金作為儲備嘅數字。
當然我哋國家就係其中一個不斷喺世界購買黃金嘅主要買家，喺今年五月我哋國家先至話停止購買黃金，結束咗18個月持續購入黃金嘅威勢，但係好快而家又傳出國家會繼續重新購買黃金，而家仲係無論經濟好定壞嘅國家，都係希望喺美元以外持有黃金作為儲備基礎。好似土耳其啲通脹升到嚇親人，但係佢哋當地嘅央行都不斷購買黃金嚟穩定人心。
Metal Focus 就統計咗舊年全年全球各國央行購買咗1,037噸黃金，呢個增長係史無前例，而且舊年金價係一直喺度係咁升，所以中央銀行基本上係唔再理會現貨金價，但求增加黃金儲備嘅比例。喺世界越嚟越兩極分化嘅時候，所謂嘅烏克蘭和平會議變咗係西方陣營宣戰會議，呢種黑白兩極對立嘅形勢，對於行咗10幾廿年嘅全球化和平氣氛帶嚟本質性嘅改變，非西方陣型嘅國家要喺美元以外搵一啲貨幣嘅穩定基礎，貴金屬係不二嘅選擇。
仲有一樣，大家可能冇留意嘅係50年前中東石油酋長同美國簽訂咗協議，用美元作為石油交易嘅工具，當然後來佢哋嘅石油王子去到牛津劍橋進修經濟學101 之後，就發現老竇俾人搵咗笨。因為之前石油係用黃金計算價格，唔使比美國聯儲局牽住個鼻走。轉眼呢50年就過去咗，呢個協議好快就會取消，咁樣黃金或者其他貴金屬仲會唔會可以同石油掛鉤呢？石油係水黃金，如果成為佢嘅交易單位，貴金屬嘅貨幣功能就會重新喺人類社會顯現出來。
大家可能唔記得香港之所以要割讓比英國，就係大清政府已經冇白銀賠償比侵略中國嘅英國，白銀其實喺百幾200年前仲仍然係重要嘅交易工具。到咗今日大家每人手上嘅智能手機仲有白銀作為製作嘅必要原料，白銀絕對係被大眾忽略將會有貨幣功能嘅貴金屬。我嘈老闆喺三月嘅時候就喺PMQ舉行嘅演講會裏面分享咗呢個觀點，如果當時嘅聽眾有聽我講嘅講解去買白銀銀條，咁今日白銀就已經上到去近十年嘅歷史高位，都唔好話唔和味。
講返嗰次係PMQ隱世食店半茶十里，除咗有各種各樣一級嘅茶葉選擇，佢嘅蒸飯同埋茶香薰雞做得好出色，仲有手作甜品真係除咗聽我嘅財經貼士仲可以大快朵頤。
曹參國
註：專欄作家言論不代表本網立場
密切留意BossMind動向！立即CLS