張敬軒近日正進行澳門倫敦人舉行的《The Prime Classics張敬軒澳門演唱會》，日前完成頭三場，軒仔每場都有福利派給歌迷，除了首場自爆初戀、第二場張媽媽前去捧場外，軒仔獻歌喊不停，張媽媽亦聽到頻頻拭淚，場面感人；第三場軒仔唱《隱形遊樂場》更唱到爆褲鏈，認真驚喜不斷。
早前張敬軒公開為母親撲飛，結果演唱會第二場，軒仔透露張媽媽亦是當晚的座上客，「如果我冇記錯嘅話，我媽媽應該係睇今晚呢場。」這時歌迷除了歡呼，突然「奶奶」的呼聲此起彼落，軒仔沒好氣的說：「點解你哋可以嗌一個陌生嘅女人做『奶奶』㗎呢？」但隨即又向歌迷說：「你哋再嗌一次俾佢聽吓吖，哈哈。」歌迷十分聽話，全場大叫「奶奶」，搞到軒仔邊笑邊說「黐線」，而張媽媽則十分怕醜以手遮面，軒仔又向張媽媽解釋，「我同佢哋冇『啦lung』㗎吓媽咪，唔好打電話嚟問我。」
講完笑後，軒仔便向媽媽來個深情告白，他坦言多年來自己的演唱會中，都未曾試過唱歌給媽媽聽，他指出今年是很忙的一年，沒有太多時間回老家，加上爸爸感染covid後又曾於家中暈倒，最後決定將父母搬到香港居住，「雖然我哋住隔離樓，但我都會抽時間返嚟食吓飯，唱隻歌俾你聽好冇呀媽咪？」張媽媽點頭讚好，軒仔續說：「佢晚晚都有煲定啲湯俾我，同埋佢好鍾意煲埋啲唔知乜嘢嚟，全部都係壯陽，嗰啲海馬呀、咩鞭呀，湯我就唔識煲啦，歌我就識唱，祝媽媽青春常駐。」
張敬軒隨後便唱出《青春常駐》，軒仔特別將一些歌詞改為「媽媽」，而第一句更將「嘉嘉可否不要老」改為「丹丹（張媽媽名字）可否不要老」，不過他唱了第一句後，已忍不住哽咽，中段更唱不下去，歌迷即時接力唱下去，而坐在觀眾席上的張媽媽亦忍不住感動落淚，場面感動。唱完後，軒仔說：「哎吔，真係搞唔掂。」
而在第三晚的演出中，在演唱《隱形遊樂場》前，軒仔積極拉票，更謂：「我會一路出嚟拉票。」隨後便唱出《隱形遊樂場》，唱完後，軒仔在分享一些感受時，台下歌迷突然起哄，初時軒仔未有為意，後來他轉身望大銀幕又再望自己衣服，「等等先，導演話我褲鏈開咗，ok，唔好睇住。」全場觀眾立即爆笑，然後走到台上一邊整理衣物，整理完後再走回台中說道：「唔好意思，對唔住，激動得滯，唱爆咗褲鏈，我條褲鏈爆咗。」原來是褲鏈爆開，全場立即大笑兼大叫「除褲」，弄得軒仔無奈苦笑。
另外，軒仔跟歌迷的互動環節時，其中一位女歌迷表示當日是她的新婚之日，軒仔笑問：「你今朝早結婚，你今晚嚟睇我，咁你個洞房呢？你老公呢？」當女歌迷表示老公沒有前來睇show時，軒仔即謂：「即係我緊要過你老公，係唔係呀？（女歌迷點頭：好明顯啦！）」軒仔隨即調戲女歌迷，「咁你快啲嗌聲老公先啦。」女歌迷二話不說大叫老公，又表示自己老公姓張，嚇得軒仔立即調頭走，「我講吓咋，我連結婚戒指都冇隻，（歌迷立即除下戒指給軒仔）你唔好當真啦，你唔好俾我，我走啦，哈哈。」除此之外，其實每晚軒仔完show後，一眾fans都會在場外等他，寵粉到爆的軒仔每晚show後都會走到場外跟見見fans，sweet到爆。