Why not run 成為跑界的 Openrun，見到佢哋三個，令你感覺跑原來可以好開心
染色體XY可以不是男人、月餅不一定要有蓮蓉、跑步亦沒有規定要衝圈爆肺，冇必要跑到面容扭曲、見到隧道前面有點光。人生、目標、兩性關係、以至常餐/快餐/特餐….… 充滿可能性和選擇，咁點揀好?
Why not run 那三位巴打會話：「隨心意啦，最緊要開心啫!」說來雲淡風輕，令一眾佛系同學、廢青/老、宅男以為找到領航員，其實 Why not run 的隨心意不是頹hea廢，只是不用迫自己 follow凡塵、緊貼俗世。人貴自high，只要活出自己，why not happy!
Why not run 活出人貴自high的精神
這種生活態度，與 Why not run 的幕後操盤人Peter有密切關係:「有啲人成日話我包拗頸，我唔係囉!」Peter，你咁咪係包拗頸囉。
Why not try
Why not run是「啱channel」的 content provider，由 Peter 策劃，近年跑遍香港各大小跑會，拍攝和介紹他們的訓練過程，還派試跑員1號 (Ryan) 和2號 (Gabriel)落場跟跑，親身體驗各款 program，訪問教練的教學理念，同學們的感受，是精簡有趣版的 Openrun。
已拍了四十多集，當中有好多 Peter 式的寸問妙答，跑界紅人和大宗師等又肯配合演出，加上粗口界代言人1號和靚仔鮮肉2號吸客，愈來愈多 fans 追捧，也受到不同的運動媒體注意和訪問。我與他們曾是跑會同學，我話晒識寫字，原本不屑他們以賣粗口和鮮肉為生，但人哋家陣紅，我不得不向現實低頭。(曲呀，現在寫文要好小心，以免有心智未成熟的小朋友亂入。)
我觀察了好多集，發現Peter每次都叫試跑員講下今日嘅感受得著，然後自己趁機喪食 (有片為證)
前陣子「啱channel」轉了老闆，找上了 Peter 提供內容。「果時我未有題材，但愛上拍片和剪片，做一些自己鍾意嘅嘢，於是接左先再諗。」可見衝動唔衰得晒，佢同婆媽要有適當平衡 (咪扮高官口吻啦)。
約了三位 Why not run 成員，四個男人行埋原應好熱血咁去操轉山先，但竟然去了老尖的『乾杯XXXXX』飲飽食醉，明顯原因是當中有位廢老，我。
四個男人吹水，得一個隊啤，粗口另上
「那時疫情之後，百廢待興，大家都在報復，報復式去日本、報復式北上消費，報復式落街跑步，短時間之內突然湧現眾多跑會。個個跑會都話自己有幾厲害，好想有機會逐個去踩下場，試下佢地啲 program 有幾勁先，於是就有『咩跑會咁巴閉』呢個系列。」
「但冇理由拍嘢係我，衝圈又係我，訪問又係我。要搵個試跑員落場砌。而且運動節目唔一定要賣老正，講點樣幫到你身心靈，我偏偏就係搵個粗口仔跑到爆晒粗，好有火咁，腦海裡即時浮現狀態正在冒升兼能操流利粗口嘅 Ryan，於是邀請佢成為試跑員1號。」中佬的 Peter 仍殘留反叛 DNA。
兄弟的約定 – 男人的浪漫
Covid 高峰期，世界停頓，Ryan 與 Peter、Sammy So 及另一跑友阿燦組隊 self support 挑戰「逆走100」，定了18小時目標，但 Ryan 在頭10K已經大落後，一直都趕不上大隊。去到水浪窩終於追番其他隊員。「佢竟然發老脾大爆粗口，話我哋唔等埋佢，有啲小朋友咁，我教訓左佢幾句。其實 Ryan 好怕鬼，好唔想得番一個人係個山度。」Peter 揭開1號要害。「爆完大家都冇嘢，跟住一齊完成，好熱血好開心。」巴打就係要呢啲。
「我果時又屎波又多嘢講。」Ryan 自省一件。
「Ryan 話 Peter 對佢好重要，因為令佢有決心去操山。」Gabriel 話呢件事仲要講好多年。
「果次對佢打擊好大，跟住半年佢閉關苦練，結果脫胎換骨，成為今日可以在各跑會A組廝殺的試跑員1號。」Peter 說了一個火鳳凰的故事。
「我唔想俾人睇死，好希望係跟住嘅 Translantau 比賽中做得番個時間。一放工就去操，一個禮拜操十零個鐘。」
「係呀，佢將18個鐘個課表 double 咁去做，佢 deserve 今日嘅成績。」Peter 好欣賞這個 from a boy to a man 的1號仔。
Ryan 閉關半年操練，於Translantau 100成功解鎖
「我好記得以前有個山友名坤同我講過，兄弟之間嘅約定，跪係度都要完成，即係一定要找數。屌，點解我做唔撚到!」1號真情流露。
「呢個就係男人嘅浪漫!」Peter 加個完美註腳。
粗口面文青底的試跑員1號
「Ryan 你點樣開始跑山?」我要追番故事的前傳。
「我畢業去左尼泊爾行山，見到遍野都是好靚嘅大紅花，晚上望見夜空，繁星點點，背景襯個喜馬拉雅山，發現山原來係咁壯麗，好想去擁抱一下大自然。」感性一面的 Ryan。
少見漫山染紅的尼泊爾春色，少見斯文 look 的試跑員1號
「但自己唔係咁夠體力。返嚟香港係朋友聳恿之下報名山賽 (報親比賽同香港小姐一定係朋友聳恿或陪朋友)，報左「5個9山賽」 (見:《圖騰跑2019 要5個9還是要樽鹽?》)，賽事有個訓練班，由『豐山跑』教練 KFC 主教，跟住加入了『豐山跑』。第一次上完跑班覺得好辛苦，想死，見到年紀大嘅同學都跑得快過我。」唔洗問，一定係點讚我 (哈哈，自己都忍唔到笑。)
「Ryan 我記得見過你以前 whatsapp 個 profile pic 下面，寫住『海邊的卡夫卡』(村上春樹2002年的長篇小說，描述一位少年奇幻的成長經歷)，呢本書對你有乜嘢意義?」
「我好鍾意睇呢本書，我諗係有少少反叛。」
「你對乜嘢反叛? 唔妥個社會?」
「……….」Ryan陷入沉思。
「佢呢個年紀就係為左反叛而叛。」Peter，世界都給你看穿了。其實因為他都是過來人。
中學的 Ryan，青澀單純，冇叛逆 feel
「我唔知好唔好講出嚟?」
「你放心，你講啫，阿孫唔一定寫。」收到，Peter 呢句其實對我講。放心，我呢啲世界仔，最叻聽一套，寫一套。
「我係好想社會變得美好，好想幫助社區上有需要嘅人。」Ryan 是個有理想的年輕人，他現時在社福機構工作，將會入讀城大的社會工作碩士課程，這是他多年的目標，現在一步一步在達成。將來會成為能操流利粗口的社工，希望社會容得下。
當2號遇上跑山遇上1號
2號 Gabriel 原本玩水為主，游水同扒龍舟，被損友騙玩毅行，35個鐘完成，又ITB又膝頭痛，已發毒誓以後唔再玩 (再=L)。有另一些損友說不如去玩馬拉松，在冇練過嘅情況下去跑，初馬5個多小時完成。
「有一天去Cam X買錶，見到可以免費報埋 Translantau 訓練班，由 KFC 主教。第一堂操單M，大東鳳凰。去到伯公坳好唔掂，熱爆，唔夠水，又冇力，於是撤左，好氣餒。入左『豐山跑』，識左好多好同學同 Ryan，覺得啱傾，於是經常約埋一齊操，我哋除左一齊玩 Translantau，Ryan 仲叫我一齊報泰國清邁 UTMB 系列賽，住同一間房，果幾個月老媽話我見Ryan多過見佢。」兄弟情濃？
我哋冇嘢，我哋冇嘢
「點解你會去做 gym 練成大隻仔?」我見 Garbriel 骨格精奇，不用著加細碼tee都成身肌肉，好奇一問。
Gabriel 爆肌係日常，絕不是賣肉求榮
「因為我係澳洲讀書時好瘦，又試過俾人打刧，真係好想強身健體。」
「你應該去學功夫喎。」Peter 同 Ryan 異口同聲。
「我以前玩好多運動，不過中學玩 hockey，打到爭啲甩較，阿媽唔俾玩，跟住玩潛水，阿媽話聽新聞講話會穿肺，只能做啲輕鬆嘅跑步打籃球果啲。」
「你應該去學畫畫作詩。」Peter 你洗唔洗咁 mean。
「好多人話操大隻身形嘅人或多或少都有啲自戀傾向，你有冇?」
「我又冇。我覺得做運動好誠實，下左苦功，就會見成績，但我唔係自戀貪靚。」
「我覺得做健身嘅人係要貪靚，你唔貪靚唔會有恆心去 keep 住做。」Peter 仍在追擊。
「其實貪靚唔係一宗罪，只不過係一種動力。」我打圓場，大家一人少句。
1、2號一齊做 gym，1號好痛苦表情，2號 selfie，兩種心情和態度，自己入座
Gabriel 憶述去年再玩毅行的經歷，大家最後環塘時追趕18小時的目標，重要的不是時間，而是期間共同面對困難和相互支持，2號覺得 we 比 me 更美!
「我唔係包拗頸」的Peter
「我知你正職是位 designer，你當年點樣同跑勾搭上?」
「我中學時好宅，冇乜朋友。突然一日有個同學叫我去跑步，開始跑香港仔水塘。佢仲叫我去報陸運會800米同1500米，當Miss讀我個名時，全班都笑到黐線，唔信我呢個宅男會跑。我心諗你哋到時唔好俾我快過你。」Peter 明顯是「人可以被毀滅，但不可以被打敗」啲 friend。結果這位宅男勇奪亞軍。
中學的800米銀牌保持至今。笑我？你咪理，快過你
「老師即刻叫我入校隊，我就偏偏唔加入。」Peter，你唔係包拗頸。
「中學之後轉去玩攀石。攀石教練叫埋我組隊玩毅行，以為行下山啫有幾難。行完1、2段至知中伏，結果行左42個鐘，真係想死，果時條褲兩邊有個 side bag 嘅軍褲覺得好型，仲要著住對『Hi-Tec鞋』，鞋底是舊硬膠，是旺角花園街用個紙兜放係鋪頭前面賣果啲。」
「完左又係講晒粗口發晒毒誓唔會再玩，但第二日瞓醒覺又會諗下如果個CP唔抖咁耐，又可以快番十幾分鐘。於是出年又會報，如是者我玩左十幾次毅行。」之後 Peter 十分熱衷參加山賽，差不多所有大型的山賽都玩過。
Peter光輝的一頁，2015年完成戈壁沙漠 250K超馬
Peter 黑仔的一頁，2016年參加納米比亞沙漠 250K超馬，變成土著
「機緣巧合認識了Run Our City (全城街馬) 的搞手和 Nicole，當年佢哋搞『圖騰跑』，好注重 design 要靚仔。知我做 design，於是搵我幫手設計第二屆圖騰跑。」當年『圖騰跑』的宣傳和紀念品等 design，確是令人眼前一亮，十分奪目。那時的山賽較少注重設計，比賽 tee 好多只能當睡衣或送俾阿爸/家傭 (洗地時著)。
一筆還一筆，當年圖騰跑的設計和市場推廣確是令人眼前一亮
「後來 Nicole 有興趣自己搞賽事，同佢合作舉辦了幾屆逆走賽事，包括兩屆實體『逆100』、『逆之女』、『逆之男』等。山界反應不俗，但跟住遇上世紀大疫症，所有活動都慘淡收場。」
「我玩過『逆之男』，覺得好唔同 feel，啲嘢好型，件tee好靚，我係會著出街。你可以話 Peter 執著，但亦都因執著而有質素，我好欣賞 Peter 嘅才華。」Gabriel 一時間又咁 sweet。
「Gabriel 你講埋呢啲，阿孫好難寫架。」Peter 都有理會我嘅感受，其實唔難，都係由讀者判定。(我話左我係世界仔。)
Gabriel 與 Peter 惺惺相惜，一起去玩9 dragons，咁多笑容，一定是起步前
「當你入左社會越耐，會發覺可以執著嘅位係愈來愈少，當一些冇個人利益，冇商業衝突嘅位時，我就會盡情去執著，做自己認為開心嘅事情，經常擔心得罪邊個邊個，做人好辛苦。」Peter呢個總結好有智慧。
「逆系列會唔會都表達一種反叛精神同態度?」(寫過有關這個系列賽事的文章」(見: 《我逆故我在》)
「都係，好多人都會順走麥徑，點解唔可以試下逆走? 點解唔可以淨係俾女性參加？」這一切 why not，正好反映 Peter 的包拗頸 DNA。
「唔係囉，我邊係包拗頸啫?」
「逆之女」當年安排一眾型男為女跑手打氣和接放學，令人尖叫。「逆」是一系列賽事，也是一種態度。
從 Why Not Run 到 Why Not Happy
「疫情之後我覺得好重要係令大家開心，成班人跑步，最開心就係跑完一齊隊啤同食野果 part 最令人興奮開心。」所以Why not run不單走訪跑會，都安排由2號主打嘅飲食環節「跑完食乜好」，介紹有特色的食肆小店。還有不定期的「飲跑食醉」Running Party 團跑活動，大伙兒放工之後，在寂靜的中上環跑完數K，出一身汗，跟住圍攏著間café 地鋪一齊吹水，過一個開開心心的晚上。
有汗水、有笑聲、有cheer、有火，呢啲夜繽紛至係有質素
「Peter 你會唔會再搞番一些較正式認真的山賽？」
「有諗過，不過要諗清楚為乜而搞，第一我唔覺得搞比賽會賺到咩錢；為推動香港越野跑？我自問冇咁大嘅使命，講出嚟我會面紅。而且家陣好多人搞啲好認真嘅賽事，搞得好好，我覺得自己無人哋搞得咁好。唯一剩番嘅目的，就係要令參加者感到開心。」
跑個步啫，洗唔洗咁踏馬，咁誓師
Why not run 在3月份搞的大型活動「一百公里慈善怒跑日」 (穿越香港九龍市區郊區)，都是集奇趣路線、精美設計、美食、豐富贊助、追加個慈善初心，但不是標榜要做時間做 FKT (最快時段)，Why not run 最重視過程開心，這是一次示範作。
重點是花生，不是時間
橫跨香港九龍鬧市100K，由朝跑到晚，唔係為賺錢，背後要有幾多cc熱血至夠用
「同樣，「咩跑會咁巴閉」背後冇乜大使命同計算，就係好玩。每次訪問唔需要稿，捉同學仔搞下爛gag，係極少接受訪問嘅一代宗師王春榮教練面前，都可以講少少廢話。」Peter 說訪問家豪 (樂家跑會教練) 時，佢自己拎住個咪就會講好多搞笑嘢，不用導演。
踩樂家場，見到貞哥和家豪妹，大家都好快樂
「果時 Peter 冧我做試跑員1號時，都話好好玩，我諗可以有機會集各家大成做張無忌，又唔洗錢。點知每次落場跑，至知屌，原來咁撚甘。」Ryan 坎坷一生。
滾動片段
Peter 憶述一次令他好有感覺的訪問:「我最有印象係訪問馮華添教練 (馬拉松訓練中心)，佢在跑界絕對是受萬人敬仰的地位。邀請佢接受訪問，多少有些戰戰兢兢，唔知會唔會應承，點知佢竟然話: 你拍左咁多集，而家至嚟搵我! 即刻鬆番晒，我話你咁有輩份，緊係攞嚟壓軸。」又兜得靚。
戰勝兩次癌症，展開第二輪六大馬之旅，馮教練示範了一次人生馬拉松是如何跑的
「佢已經六十多歲，得過兩次 cancer，都克服過來，現在還展開第二 round 嘅六大馬計劃，仲要兼顧教班。看見馮教練，好大鼓舞，你唔會諗到有想跳船嘅藉口。」
1號接力: 「我對『奮進跑會』好有感覺，應該唔係咁多人識，但有二、三百學生，約10個分班。由湘教練 (盼楊銳) 成立，已超過十年歷史。佢哋好照顧一些基層、或者經濟有困難但有興趣跑步嘅人，可以唔收學費，仲送埋裝備。感覺成個跑班好互相支持，好溫暖好有愛。教練、助教和學員都係好單純為左跑步而來，冇商業元素。」好符合 Ryan 一貫著重嘅人文精神。
奮進會的湘教練是位小學老師，無私為學員付出，特別照顧基層同學，令1號滾動
「有些跑會同我哋講番，Why not run 播出街之後，多左好多學員報名，有網友話因為睇左某集介紹而去參加跑會。我哋雖然冇 commission，但好有滿足感。而家操山，好多跑友都會同我哋打個招呼：你咪試跑員1號，我好鍾意睇 why not run，好開心。」1號家陣紅啦，希望他發揮的影響，是他堅持要找數和顧懷弱小的精神，而不是推廣了他的語言文化。
Why not run 把跑帶到中上環街頭，參加者把歡愉和自信帶回家
彩蛋 – Why not 女試跑員
見到試跑員1、2號兩個巴打咁有性格咁被人受落，好多人都想問：點解冇女試跑員?
「最初有左1號之後，真係諗過搵個女試跑員。你知啦，女跑手係流量密碼，點會唔搵。」Peter 是 marketing 高手，自然熟悉森林法則。
「起初1號同那位女試跑員都同時答應，我哋拍左1號先，點知女跑員一睇片，嘩，好難接受囉，見到1號跑完之後上氣唔接下氣，面容扭曲個樣，如果發生係自己身上，真係唔洗見人。」可能1號又交多左少少戲。
大家即刻明晒點解招募唔到女試跑員
「Peter 你可以 P靚佢得唔得? 或者馬賽克佢。」眾人紛紛提議。
「唔得，我就係要面容扭曲，成個嘔包個樣，至知個 program 有幾甘。你都見，有時個鏡頭哄到好埋影1號個衰樣，大家都鍾意睇真人 show。明白女士會有抗拒。」
「唔好話女，其實要搵多個男嘅都好難。1號要自費買多部機拍嘢，因起初得一部唔夠拍。2號要自資添置航拍機，佢哋都係帶錢返工，有時趕時間仲要搭的士過嚟拍，相信塵世間好難會有3號嘅出現。」
「講到咁委屈，點解仲繼續拍落去?」我挑機。
眾人齊答:「開心囉!」
是晚1、2號秘密地預備了生日蛋糕，慶祝Peter牛一，巴打情濃，Peter甜在心裡
The post Why not happy | Why not run a 隨心意的生命 appeared first on Fitz 運動平台.