向來以演技見稱的蔣祖曼（Joman），於TVB《法證先鋒VI：倖存者的救贖》中成功以「名模身段」吸引目光，在戲中穿著一襲露腰裝不但展現超幼蛇腰，馬甲線亦是清晰可見。Joman坦言開拍前沒有為角色刻意操線條，反而有Keep住節食和運動去維持角色所需的瘦削身形：「當時除咗停晒所有澱粉質同糖，都有做吓HIIT或者帶氧運動同拉筋。嗰時開工喺酒店有預備到一Set啞鈴，總之要保持體態，都係要管住個嘴，同埋邁開你嘅雙腿。」
蔣祖曼與林漪娸戲中亦有不少衝突場面。首度與漪娸姐合作的Joman笑言最初好驚，但經過數次交手後即愛上漪娸姐：「原來佢表面睇雖然好嚴肅，但實際係超Nice超專業，雖然我同佢係拍攝時先見面，但因為佢好溫柔、好親切，所以大家一嚟就有研究劇本同係咁交流。有場佢情緒起伏都幾大嘅戲，但無論係近鏡定只係背對鏡頭主力畀戲我，佢每次都可以好精準咁拿捏到個情緒，真係好佩服，我好鍾意漪娸姐呀！」。
昨晚（9月3日）播出一集新單元個案「針筒殺人事件」中，銷售員文樂德（葉泓聲飾）被發現倒斃於後巷，半裸的上身更甚有儀式感地插了大量針筒。正當Dr. Fan（蔡潔飾）及井Sir等為搜尋真兇苦惱不已之時，冼陽（關楚耀飾）向Dr. Fan投訴其介紹給自己的護士阿瑩（倪嘉雯Carmen飾）行徑古怪，似是涉及「針筒殺人事件」。最終東窗事發的阿瑩逃跑至天台、並危站於高達17層樓的大廈天台邊緣與Dr. Fan對峙，備受嚴重濕疹問題困擾長達二十多年的阿瑩，全程含淚激動申訴多年來被頑疾纏身的痛苦，更企圖自盡結束痛苦一生。
Carmen拍攝阿瑩危站天台的場口時雖然做足安全措施，但一眾幕後同事也戥她牙煙：「我真係企喺天台外面度拍，雖然有吊威也，但因為嗰度風好大，工作人員都驚我會企唔穩。拍嗰陣我一路講一路向後褪，突然間見到有工作人員係咁同我揮手，原來佢哋驚我愈行愈後會真係跌咗落去，嚇死佢哋。」Carmen坦言很開心能於實景天台進行拍攝：「咁樣好幫到我投入個角色，我情願真做，好過喺綠幕度做，可能我比較新，我仲係好需要個環境帶到個感覺畀我。」
除了天台這個場景，Carmen又感激劇組認真的「濕疹」化妝及近乎密不透風的服裝造型，讓她更易代入角色的苦況：「呢個濕疹妝其實要化好幾個小時，因為頸、心口、背同手臂全部都化。自己一化完妝照鏡都覺得好心噏，幻想到一個廿幾歲嘅女仔、一個仲應該喺貪靚年紀嘅女仔，見到自己咁會有幾咁痛。服裝上，就算我著護士服，入面都會有件樽領打底嚟到遮濕疹，同人約會時又要摟住頸巾遮，呢啲都好幫到我代入角色。」
