陳豪台慶抗旨戴罩避過一劫 罩不離口宣萱讚穩陣

早前無綫台慶夜超過二百藝員出席，大堆頭集會個個盛裝示人，攞正牌唔戴罩，見面時口水互噴防疫意識甚低，當晚陳豪見勢色唔對，大合照後迅速戴罩，被指過於驚青，事後有份出席的蕭正楠因工作曾接觸新冠狀病毒的確診者，要接受強制檢疫，而所有出席台慶的藝員亦要接受測試。

撰文、圖片：東方新地

陳豪眾人皆醉佢獨醒

今年的台慶夜（11月19日）非常熱鬧，有205名無綫藝員出席，難得聚首一堂，不少藝員都放下戒備脫罩埋身接觸，社交距離等於零，全台大合照時，藝員圍埋自拍好興奮，卻出現了得陳豪一支公戴上口罩的有趣場面，無錯！全場藝員得陳豪一個有先見之明，最有警覺性，因為台慶夜熱鬧過後，無綫即發出內部通告指，蕭正楠於11月18日為MyTV SUPER在某食肆拍攝飲食節目，其後該食肆一名職員被確診，蕭正楠亦因此被列為緊密接觸者，並於11月24日被安排接受強制檢疫，鑒於蕭正楠有參加台慶節目，為謹慎起見，所有當日有出席台慶的藝員亦要接受測試，結果全屬陰性。陳豪眾人皆醉佢獨醒，抗旨戴罩不是為了自己，是背負住一家五口的健康，自今年初疫情開始肆虐，陳豪一秒都冇鬆懈過，除了埋位拍劇或拍照一定要見樣，其餘時間他堅持罩不離口，並刻意與人保持社交距離，生人勿近一樣。

抗旨戴罩避過一劫

據知台慶當晚全台藝員收到指引可以唔戴罩出鏡，大家都掉以輕心，而陳豪的舉動可以反映他的個人防疫意識比常人高，知情者透露：「一年一度台慶夜喎！今年仲算係多猛人參與嘅一年，大家難得聚頭真係放鬆晒，只有阿Mo（陳豪）憂心忡忡，佢睇見現場個個黐埋一堆自拍，已經皺晒眉，有人邀請佢合照，佢都好有禮貌耍手，平時好nice嘅阿Mo堅守自己嘅原則，大家都唔覺得奇，亦唔會怪佢唔合群，因為呢大半年嚟佢返工拍劇都好小心，盡量避免同人太親密，未埋位都保持距離，唔會約埋食飯，盡量戴口罩同勤用消毒液洗手。」當晚局部戴罩的陳豪，中招風險當然比其他藝員低，不過他亦好合作進行測試。

甜品店疫市開分店咖啡店拒裁員

受到疫情影響，社會各行各業經濟下滑，但陳豪與金牌監製戚其義有份投資的甜品店，疫市中仍可於銅鑼灣開第二間分店，日前陳豪現身剪綵時，對於台慶夜超過二百位藝員參與卻全部沒戴口罩合照，陳豪被指第一時間戴回口罩，他說：「雖然確診數字低亦唔代表可以鬆懈，大家都要小心防範，因為可能呢個狀況以後都係咁，所以要改變想法，亦要喺經濟上諗諗如何重新建立過，唔好數字低就鬆懈。」談到近日確診數字回升，令人擔心爆發第四波疫情？陳豪坦言：「我係有啲擔心安全問題，亦明白台慶上大家怕整花個妝，我自己寧願犧牲少少個樣，否則中咗就會連鎖性爆發，真係唔好掉以輕心！」

陳豪其實最怕就是一個累全家，身為廿四孝老公兼爸爸的他把家庭放在第一位，為免染病惹返屋企，寧願自己做足防疫措施，早前他與宣萱合作拍《陀槍師姐2021》，宣萱公開大爆陳豪返工如臨大敵：「陳豪真係好謹慎，未埋位佢一定戴住口罩，最後一秒先會除罩！」除了拍劇高度防疫，陳豪以往不時為其自家咖啡品牌「Blooms Coffee」開的pop up store及K11 Musea店做生招牌，近月他已停止露面做宣傳，避免聚集人流，生意額雖然有影響，不過好老闆陳豪從無打算裁員，他表示希望與員工共度時艱。