今屆香港小姐早前以網上真人騷試形式進行，及後突然改玩真人面試，一大早78位天使妖獸混雜湧入電視城，相隔十個鐘，晚上八點再嚟網上直播進行第二輪「面試」，踢走一班奇珍異獸「佳麗」，篩剩十七位，加埋海外網上三位參賽者，湊夠廿人。
文：東方新地
周二（六月三十日）一大早眾參選佳麗親身到無綫電視城進行真人面試，有不少是之前網上面試的參賽者，網上真人版差別不算大，算有番咁上下質素，不過當中亦有不少未見過的新面孔，質素頗為參差，一共78人湧入電視城首次面對傳媒，同時無綫宣布晚上八點進行直播面試由網民選出喜愛佳麗，再加入大會分數才決定入圍佳麗，殊不知原來已精選了十七位分成不同組別參賽者，由陸浩明主持問答及代網民問問題，考一班參賽者即時反應。十七位參賽者面對鏡頭尚算淡定，不乏高質，一文睇晒眾參賽者資料。
侯嘉欣三圍數字係34 25 36，在英國讀設計，今年畢業，之前因為網上面試妝太濃被網友笑稱「阿梅」，真人版順眼好多，有啲似岑杏賢，不過一棚黃甘甘牙大殺風景，佢話如果真係入到圍會去整白啲牙喎﹗源菲然身高168cm三圍係34 25 36，南非出世，蘇格蘭讀大學，被網民笑反應慢三拍，又笑佢腳多瘀㾗。23歲的何孟珊身高172cm體重52kg，中大護理系畢業，是一名註冊護士，被網民質疑鼻樑離奇過高，司儀要求另一佳麗即場為她驗鼻，何孟珊解釋可能因燈光問題，更自整豬鼻強調純天然。有翻版鍾嘉欣之稱的蔡頌思26歲身高157，體重95磅，被揭是40億千金是海產大王蔡繼有個孫女！蔡頌思未有否認：「實際數字唔知。」佢自稱是一名自由身演員，拍過賀歲片。網上面試時被指大熱的廖慧儀 Jessica曾任職空姐，現在是一名瑜伽教練，回應傳聞指已有未婚夫，她解釋是因工作跟男友影相，並非已婚。20歲的賴琦媛身高165cm，是一名建築學系學生，被網友爆有名車接送面試，Ivy寸咀答：「唔明名車定義係乜，我今日係 call uber坐Benz嚟，如果Benz係名車，咁我係成日坐名車﹗」陸號追問咩為之名車呢，佢答：「法拉利﹗」樣子有點似譚凱琪幾甜美，可惜寸咀扣分。阮璟彤今年23歲，身高163cm，在德國讀書，熱愛玩MMA、巴西柔術，睇佢身型睇得出好打得。自聲是美容編輯及KOL的羅雪妍，25歲，身高168cm，在浸會大學讀電影直言想做幕前，仲話自己IG有二萬一千個followers。被指是後生版謝雪心。被指同金宇彬撞樣的23歲陳槙怡，話參選係想帶正能量畀大家，但係問一句答半答得超級精簡，目無表情，陸號想撬開佢把口都難，叫佢畀個燦爛笑容大家睇睇，都只係咁，cool到爆，陸號忍唔住問佢：「哦﹗笑咗㗎喇﹗」18歲的謝恩靈身高165cm，熱愛玩古箏，自誇同時有三個追求者，不過都被佢拒絕，因為唔想拍拖。26歲的黃婉恩Yancy激似高海寧，在英國讀畢碩士返來，暫時最高學歷，被指在IG常露肉，她話唔覺自己性感喎﹗陳煦凝Amber，24歲體重95磅，身高160cm三圍係32 22 33是一名financial planner，自爆曾高達130磅努力減磅及操出馬甲線，被網民指似蔡少芬，Amber即話：「可能我講嘢大聲所以似蔡少芬。」麥詩晴係一名freelance model，個樣有啲似靚女煮神阿Kit。已考獲芭蕾專業試資格，被陸號要求即席示範，一舉起手，被網民笑指「加拿大黑掹掹」，她即解釋可能因膚色較黑。從事市場策劃的黎秀嫻今年23歲，介紹自己時話自己係家中大家姐所以好有責任心同好識照顧人，咁同選港姐有乜關係呢，大家姐？被指似女版馬明的范倩雯，今年23歲身高173cm，體重49kg。郭柏妍出席面試的白色裙被網民指是五十蚊人仔淘寶貨，她澄清絕非淘寶貨，價值約三四百蚊。22歲的梁懿婷被指似孫藝珍，立即笑唔停口：「係女仔都鍾意被人讚㗎啦﹗」又指為了參選港姐而努力減肥節食。大量波圖任cap
十七位候選佳麗質素唔錯，熟悉玩social media的就知社交網的重要性，為突圍唔介意露肉博出位，「健美版蒙嘉慧」廖慧儀Jessica、「細細粒蔡少芬」陳煦凝Amber、「纖瘦版高Ling」黃婉恩 Yancy就三點式鬥露肉，未入圍先發圍﹗
做過一年空姐的Jessica，現任瑜伽教練，更即場招生，勁識搶人氣同生意。係幾索嘅健康膚色又有身材，唔介意露都好正常。身形嬌小的Amber被指似蔡少芬，穿上性感三點式大露波底。佢話好鍾意行山，行山也不忘騷身材。Amber自爆體重高達130磅係肥妹仔一名。經過努力節食，每餐計算卡路里後變成現今體重95磅，仲練出馬甲線。Yancy的IG內有大量水著，佢話唔算多喎﹗愈睇愈似高Ling，雖然冇高Ling咁勁身材，但勝在平均。斯文look都唔錯。被爆係四十億千金的羅頌思，喺社交網亦不乏三點式水著照，身材都唔錯。呢個側面加上笑窩真係好似鍾嘉欣。演過舞台劇、拍過廣告、拍過賀歲片《家和萬事驚》同張達明、吳鎮宇合作。26歲的羅雪妍是一名KOL，有二萬一千個followers，都有露下身材，不過先天條件缺乏，佢話好想做幕前，被指激似謝雪心，可以喺《降魔的前傳》做心姐後生版，如果會開拍嘅話。睇佢呢個甫士就知佢係心姐年代嘅人啦，心姐都好叻游水㗎。海外佳麗被安排網上特訓
除了十七位候選佳麗，晚上直播還有三位海外佳麗進行面試，質素都唔差，不過若然入選，要飛嚟香港隔離十四日，又要於網上進行特訓，有一定難度，唔知到時無綫又玩乜新花樣，唔講咁多睇樣先﹗
身在美國波士頓的台灣美女吳家慶Jenny，稱熱愛瑜伽，而被陸號要求即席示範瑜伽，Jenny彎腰舉手，一啲都唔似做瑜伽，不過誠意搭夠啦。呢個係瑜伽動作？蘇格蘭香港混血兒謝家怡Lisa，樣子甜美可人，是一名手術室護士，問到對香港嘅感覺係點，佢第一時間話最愛香港美食。五官標緻的Lisa一見全身，下盤闊到嚇死人，唔怪得話最掛住香港美食啦。現於澳洲讀醫的23歲黃子君Sandy樣子清純，自言熱愛唱歌表演，被網友指似湯唯、岑麗香、李綺虹，不過佢冇一個識。全身望落都唔錯，仲見到佢間屋好大㖭。