姊妹淘鬥幸福 蔡嘉欣風騷晒有米男友

近年無綫節目《姊妹淘》有唔少新血加盟，當中包括去年參選港姐五強止步嘅蔡嘉欣同IG女神Jumbo(曾淑雅)，二人同樣係長腿高妹，深受宅男粉絲愛戴。蔡嘉欣入行時已被爆有個出手闊綽嘅ibanker男友，Jumbo就話有追求者仍在了解中，鬥幸福蔡小姐似乎暫時跑出。

撰文：東方新地

轉揸有米ibanker

唔少女藝人都想釣金龜搏上岸做少奶奶，參加選美都係目標為本做跳板，26歲嘅蔡嘉欣(Kayan)入行已經係KOL，其社交網站上有超過10萬粉絲，但人紅是非多，去年選港姐已被網民爆黑歷史，指佢因拜金而拋棄舊愛結識有錢新歡，而該名ibanker男友為方便Kayan參選，喺將軍澳天晉租咗個月租近25,000蚊嘅單位，方便佢出入。

據知Kayan同ibanker男友已拍拖三年，日前佢喺IG高調放閃，po出與男友搵專業攝影師所影嘅靚相，仲叫網民幫手讚佢男友靚仔，唔通係為影結婚相做定熱身?除咗晒仔，Kayan仲鍾意晒水著，早前身穿心口開窿嘅紅色泳衣，去酒店開P，疑似為男友慶祝生日，仲由早玩到晚，玩足兩日一夜。

大量追求者

至於入行近十年嘅Jumbo曾淑雅，兜兜轉轉由網紅轉做電視，兩年前被影到與熟男蜜遊台灣，佢承認正在發展中，不過日前Jumbo29歲生日，成班《姊妹淘》姊妹送上禮物為佢慶生，Jumbo接受訪問時話依家有好多追求者，有合適對象正在了解中，不過仲未係男友，見佢甜絲絲含晒春咁，應該都好快成事。後生女有青春有本錢，揀擇啲冇壞嘅!