【頭條獨家】男友花六小時到內地送藥 江嘉敏熱戀期冧爆晒命

江嘉敏（Kaman）早前被指「收兵」，瞞住電競公司高層男友Anthony跟其朋友兼生意拍檔「X先生」王仁灝搞曖昧，但小風波冇阻真愛，兩人愈愛愈烈。之前江嘉敏跟楊潮凱、傅嘉莉等去咗廣州、清遠、連州拍《識玩旅行團》第二輯，她自爆外景期間發燒唔舒服，男友來回用咗6個小時，人肉速遞送藥送心意卡。問到係咪喺「收兵」風波後男友更緊張她？她冧爆說：「熱戀期係會做多啲sweet嘢，佢仲應承我，以後都會咁做，多啲嚟探我班呀。」採訪：方騫平11月4日係Kaman 25歲牛一，Anthony喺社交網站貼出二人甜蜜照，大男人Anthony仲唔怕肉麻，公開冧稱女友做「my boss」，Kaman秒速畀like。江嘉敏指男友好錫她，之前返內地外景時濕完身又曬過，有晚突然發燒，當她視像嗲完男友後，料不到他竟飛奔前往送藥及心意卡。男友愛人肉速遞
講返件事，江嘉敏仲好回味：「當時我準備上牀，佢扮room service撳門鐘，我真係畀佢嚇親，係感動嘅，尤其長途跋涉嚟到，因為第二日要返工，只能短留個零鐘就要走。（經過上次小風波後更愛對方？）熱戀期係會做多啲sweet嘢，唯有返港後請佢食餐好嘅。其實佢經常會嚟探班爭取同我見吓面，之前去台灣拍《殺手》，佢都有專程過嚟同我慶生。」當問到婚期時，江嘉敏就話言之過早喇。